Amerikaanse data en SA aanwysers

Vrydag se episode het afgesluit met die eerste aanwysers van hoe die ekonomie in Augustusmaand gevaar het, en dit was heel positief, maar dit was nie die einde van die storie nie. Vrydagmiddag is Amerikaanse “non-farm payroll” data bekend gemaak en dit het gevolge gehad. Die verwagting was dat hulle 300 000 nuwe werksgeleenthede geskep het in Augustus, en dit was toe 315 000. Dit beteken dat die Amerikaanse ekonomie nog warm loop en dat daar ʼn groter kans is dat die Federale Reserwebank hulle beleidsrentekoers aan die einde van die maand weer skerp kan verhoog. In sy Jackson Hole toespraak het Jerome Powell dit duidelik gemaak dat hulle agressief sal optree om inflasie onderbeheer te bring. Vir ons hier in Suid-Afrika beteken dit ongelukkig ʼn swakker rand-dollar wisselkoers, meer wisselvallige beurs, en eindelik ook weer ʼn styging in die repokoers. * Die Ekonomie Minuut word ondersteun deur die NWU Sakeskool.