ÁNXEL CASAL, un editor para GALIZA

Conferencia de Xose Luis Axeitos no Ateneo de Santiago en decembro do 2012 sobre Ánxel Casal, fundador da Editorial Nós, desde onde continuou a publicación de A Nosa Terra ou a Revista Nós. A súa actividade como libreiro e impresor é fundamental para explicar o desenvolvemento do galeguismo na época de preguerra. Uniuse á Irmandade da Fala da Coruña, colaborou no Conservatorio da Arte Galega e foi o promotor e primeiro mestre da Escola das Irmandades entre 1926-1931, a chamada escola Semente, a primeira que utilizou o galego no ensino. Militante desde a súa creación do Partido Galeguista, foi Vicepresidente da deputación Coruñesa e do Comité executivo para o Estatuto de Autonomía, desde onde desenvolverá unha frenética actividade para conseguir a súa aprobación. Tamén foi alcalde de Santiago, desde febreiro de 1936 até o 9 de xullo. Tras o trunfo da sublevación militar do 18 de xullo escapou para a parroquia de Vilantime en Arzúa, onde foi detido o 4 de agosto, e "paseado" o 19 de agosto. O seu corpo apareceu nun foxo da estrada de Cacheiras, no concello de Teo.