Berom(Birom) - "Kalmomin Rayuwa(Hausa)".3gp

Berom(Birom) - "Words of Life(English)".3gp  // 1 KƆRINTƆS 13. - Neha e ra tɛ̂ yey1Ka sede mê kyɛm me ha na mwa balêm bemat tanga vê betom-lagwi, ko ma tɛ̀ yey na bemat wɛt, ma sé sede gyɛngɛrɛng de wo tosho kɛ gwodyam de gwo ta lwɛ́lɛ zɔng. 2Ka Dagwi a nɔng me nɔrɔ̂ zarap, kɛ ka ma vɔk tɔ̂k pyɛ̂ mwa, na me to tɔk pyɛ̂ neyaang yê Dagwi mwa arɔng, kɛ ka ma vɔk sêy tsak o yere hemo de hê nɔng me reto na me tɛ̀ beraku be gwɛ̌ sek yi e nekwɔn sangâl vɛ, ko ka ma tɛ̀ yey na bemat wɛt, ma sé pyɛ cak wɛt. 3Ka ma ka nɔ̂ng bepɛng pyɛ̂ mwa de ma vɔk, na me to nɔng rebek hom na be rangas rɛ na kya, ko ka ma tɛ̀ yey na bemat wɛt, ma rɔda sɛ̀ pyɛ cak yi na ra ano wɛt. 4Mwat de e tɛ̀ yey na bemat e niri, ko e rá a bemat nerat arɔng. E bɛrɛng bemat ves wɛt, e tos to mɛ wɛt, ko e dak kaa arɔng wɛt. 5E vɔk negwɔn neves wɛt, ko e jāma pyɛ yaga tó mɛ wɛt; e wok shom ziri wɛt, ko e vɔk e yey pyɛ́ vyes de bemat ba ra a yɛ arɔng wɛt. 6E vɔk yey pyɛng e de râ neves wɛt, ko e vɔk yey pyɛng e de râ pyɛ de ya sé mwin. 7E hàla mwat e jeng negbang ko tyɔng wɛt; e tó yey na bemat ko tyɔng wɛt; e sɛt yey mɛ wɔgɔ, pyɛ̂ mwa yê sè naka; ko e tumal gak e ji kayɛ pyɛ arɔng. 8Tɛ̂ yey he radɛ e jeng cak wɛt. Ko jeng ye kyè vey de neha yerê nemo de be zarap nɛ na rɔda ba tala hɛn. E jeng o, bemat de be ha na balem de ba tɔk vɛ wɛt ba rɔda ba wɛrɛn yuu, ko tɔ́k arɔng ha rɔda ba kwey. 9Pyɛ́ de wot a tɔk a remo ya sila wɛt, ko neha de wot e zarap nɛ na sila arɔng wɛt. 10Ko jeng de Dagwi a rɔda ba sila kayɛ pyɛ gyat, pyɛ́ yemo de yá kana sila gyat wɛt ya rɔda ba ye bit. 11Jeng de má sè hwey, má ha sede hwey, báre hom há sè hê hwey, ko ma tɔrɔng pyɛ́ sede hwey. Ko jeng de ma vey mwat, ma hàla negwɔn yerê ne nèy. 12A remo, wot e bɛrɛng dip-di-dip zɔng sede e madɔbi; ko e bama mo, wot a rɔda ba bɛrɛng kyɛrɛng bayis na bayis. A remo, pyɛ́ de ma tɔk ya sila wɛt, ko e bama mo, ma rɔda ba tɔk yɛ̄ mwa naka, sede remo de Dagwi a tɔk me mwa naka arɔng. 13Ko di, a sé e pyɛ́ tyat yemo de ye nàra. E yɛ̄, à sêy tsak o, na sɛ̂t yey e ra pyɛ́ de ye kyè vey, tanga tɛ̂ yey. Ko pyɛ de ya dal mwa e ji yɛ̄, yɛ̀ à tɛ̂ yey.