Bi’n Mors kreegen

What this episode covers

Bi’n Mors kreegen Ick glööv fief Johr is dat nu her, dat ick mi ’n niedet Smartfohn köfft heff. Na jo, dat weer je ni mol ’n Niedet, dat weer gebruukt. Annerlei. Jedenfalls heff ick mi mit den Apparot allerbest utkinnt. Overs denn, an’t vörige Weekenenn fung dat scheune Dings, för dat ick mi jüst erst ’n frische schmucke Löllertasch köfft heff, dat Tüün‘ an. Dat hett ganz dösige Töön‘ vun sick geeven, un dat hett sick ni mehr richti bedeen loten. No dree, veer Stünnen Versööken un in’t Internet rescherscheern, heff ick dat Platt mokt un in Urtostand trüchsett. Twee Doog loter, dor harr ick allns so half weller op’n oln Stand, fung dat dorste Dings weller an verrückt to speeln. Weller fief Stünnen wech. Denn weert overs ganz vörbi. Fierobend. So fung ick an, in’t Internet no datsülbige Modell to sööken. Overs dor geev dat eenfach keen Anstännige mehr vun. Un de, de dat noch geev, hebbt fürchterli utsehn. So bün ick dat erste Mol in mien Leven in’ Elektromart ween, üm mi ’n hogelniedet Smartfohn to kööpen. As ick mi för een entscheed‘ harr, gung dat overs erst richti los. De Verkööper hett meent: „Also dor is je keen Netzdeel bi, ne. Un ehr oled Netzdeel künnt se dorför ni bruuken.“ Also Netzdeel in Inkoopskorf. „Un de ole Hüll‘ de se hebbt, passt dor ook ni to. Dor bruukt se ’n Niede.“ Also ’n niede Hüll‘ in Korf. „Hebbt se eegentli ’n Viren-Schutzprogramm?“ Nä. Rin dormit in Korf. „Un wüllt se unse erwiederte Garantie hebben? Kost blots veer Euro in Monot.“ Ick weer in de Zwickmöhl: De Garantie betohln, liekers nie wat passeert, oder keen Extra-Garantie nehm‘ un mi argern, wenn doch wat passeert. Ick heff mi dorgegen entscheed‘. Liekers keem‘ dor op’t Letzt‘ nochmol 70 Euro op den eegentlichen Verkoopspries to. Bi’t Betohln wurr mi klor, dat intwüschen veel vun mien Arbeit, mien Termine un so wieder övern Ackersnacker löppt. Op dat Dings kann ick gor ni mehr verzichen. Jungedi. Mi dücht, de dorste Technik hett mi ganz scheun bi’n Mors kreegen. Un wenn ick dat richti inschätz‘, denn bün ick ni de Eenzige, den dat so geiht… In düssen Sinn

PodParley-generated summary based on available episode metadata and transcript content.