Compromisu por Asturies alerta sobre un “ataque brutal” a la llingua asturiana cola sida de la crisis

La baxa de les subvenciones a la llingua asturiana en más del 60% solo pue lleese en términos políticos, non económicos Dende Compromisu por Asturies alértase sobre l’ataque que ta sufriendo la llingua asturiana dende l’alministración pública cola sida de la crisis económica, al conocese esta selmana la rebaxa en más del 60% les ayudes que tolos años se destinen a la promoción llingüística. Yolanda Huergo, portavoz de la organización, afirmó que “si la cultura ye una de les principales perxudicaes pola baxada de presupuestos, y la cultura asturiana va vese especialmente desprotexida pola falta d’inversiones y presupuestos específicos, la llingua va vese especialmente perxudicada polos prexuicios ideolóxicos de la xente que nos gobierna”. Huergo recordó que la llingua asturiana “ al nun tener oficialidá nin existir una política normalizadora afayadiza, tan nuna situación límite y nun podemos escaecer que la promoción y l’apoyu del PSOE nun vien d’una convicción propia, sinon de la movilización social y la voluntá de la mayoría de la sociedá asturiana, incluyendo votantes de los partíos mayoritarios, que nes décades pasaes apoyó un procesu de normalización que dende l’alministración trató de ralentizase”. Nesti momentu, según Huergo “ la crisis ta valiendo pa que’l gobiernu, que nun tien nengún interés real cola normalización de la llingua asturiana, tenga una oportunidá pa desentendese cola sida de la situación económica, y ello pue vese nesti recorte desproporcionáu y mui perriba de la media d’otres partíes, lo qu’amuesa una motivación política”. Poro, dende Compromisu por Asturies exíxese una rectificación, pídese claridá na política llingüística y ufiértase l’apoyu a les aiciones o iniciatives que puedan llevar alantre organizaciones cíviques o defensores de los derechos llingüísticos pa tornar estos ataques.