Compromisu por Asturies alvierte de que los datos llaceriosos de paru y tasa d’actividá tienen culpables n’Asturies

Yolanda Huergo afirma que los datos de desemplegu y de la tasa d’actividá son el reflexu d’unos políticos asturianos que prefieren discutir sobre la independencia de Cataluña, que sobre los problemes d’Asturies nel Parllamentu Yolanda Huergo, como portavoz nacional de Compromisu por Asturies, calificó como previsibles y apavoriantes los datos de la Encuesta de Población Activa (EPA) del III Trimestre de 2012, onde a una tasa de paru de 21,84% únese la tasa d’actividá más baxa del Estáu, lo que quier dicir qu’ensin la emigración de los xóvenes y les prexubilaciones anticipaes esistentes, Asturies superaría guapamente la media estatal de desemplegu del 25,02%. La portavoz nacional criticó la escusa habitual del Principáu énte estos datos, xustificándolos como frutu d’una crisis mundial contra la que poco se pue facer dende Asturies. “Mui cerca d’equí hai comunidaes con datos bien diferentes, como Cantabria col 15,71% o’l 15,48% del País Vascu, colo que nun tenemos por qué resignanos, nin aguantar escuses que namás sirven pa tentar d’esconder el bultu”. Dende Compromisu por Asturies, los datos de la EPA son consecuencia d’una clas política asturiana que “llee los discursos que-yos escriben dende Madrid, onde’l paru d’Asturies nin se menta” y punxo como exemplu la última xunta sobre l’estáu de la rexón onde “prefieren discutir sobre la independencia de Cataluña que sobre los problemes d’Asturies” Yolanda Huergo recordó que “la tasa d’actividá d’Asturies, la más baxa del Estáu con un 52,72%, ello ye que somos la Comunidá Autónoma con menos persones n’edá de trabayar que puen y quieren facelo, y qu’ello remanez de los procesos d’esmantelamientu de los sectores productivos del país vía prexuvilaciones” unío a ” la emigración creciente de los mozos asturianos espulsaos del mercáu llaboral” son los únicos motivos polos qu’Asturies nun supera la tasa estatal de desemplegu asitiada nel 25,02% y convierten en fantasía’l datu del 21,84% de paru n’Asturies, ya de por sí inasumible. Asina, afirmen que “con una tasa d’actividá como la de les Islles Baleares del 69,14% les cifres de paru n’Asturies sedríen de récord na nuesa historia”: Pa Compromisu por Asturies “la fuelga xeneral del 14 de payares tien que ser una oportunidá p’acabar coles polítiques de recortes de la Troika y el gobiernu de Rajoy, y pa ello tenemos que superar el marcu de protesta de los sindicatos UXT y CCOO, y plantegar una crítica que vaya más allá de reforciar la posición negociadora de los sindicatos mayoritarios, sinón pa obligar a un cambéu de réxime onde la política económica seya de y pa la ciudadanía” apuntó Yolanda Huergo.