Compromisu por Asturies sofita la marcha del 15-S

Compromisu por Asturies anunció que la organización sofita la marcha del 15 de setiembre en Madrid y qu’una delegación va dir a la mesma’l próximu sábadu. La organización asturiana considera que “l’amenaza de los retayos y el retrocesu brutal nos derechos llaborales y sociales faen necesariu’l sofitu a les respuestes que s’articulen, y coles que se debe dar al gobiernu del estáu un avisu contundente que-y faiga rectificar la situación actual”. Dende Compromisu considérase igualmente que nos atopamos nuna situación de involución na que se tán cuestionando tolos mecanismos democráticos de decisión y pretende desmantelase lo poco que queda del exiguu estáu del bienestar col que cuntábamos, al traviés d’una estafa na que la tarifa de la crisis van pagala los que nun la xeneraron”. Compromisu señaló amás que la situación actual n’Asturies superpónse a la crisis estructural que sufrimos nos postreros 30 años, y a una condición subordinao y periférico a la que se nos condergó, lo qu’amenacia con convertinos definitivamente nun país esmanteláu nel que l’únicu futuru sía la emigración xeneralizada a la que yá se vieron espuestes delles xeneraciones de mozos y moces, polo que nun cabe la resignación y ye obligada la llucha contra l’actual modelu y pol futuru de Asturies. Sicasí dende Compromisu por Asturies plantégase que la presencia na marcha faese con un espíritu d’unidá na respuesta y de la necesidá d’un mensaxe claru y conxuntu, pero ensin escaecer que parte de los convocantes tienen una gran parte de responsabilidá na situación actual, especialmente nun país como Asturies, nel que coxestionaron un modelu económicu nos postreros 30 años que nos llevó a la situación na que nos atopamos, y que s’agrava poles polítiques selvaxes del PP y ponse de manifiestu que nesta y na anterior llexislatura’l PSOE ta aplicando en Asturies una política de retayos en servicios públicos.