Ebira Okene -"Kalmomi na Rayuwa(Hausa)".3gp

Ebira Okene - "Words of Life(English)".3gp // 1 ANỊKỌRỊNTỊ 13. - Ẹ yị nyị ịsị e huna ịrẹyị ọza oyisì1Ọ̀ọ daka zee eyi maa sị ẹkụra azaa kà ịrẹyị, dị ma hyakụ rẹẹ kà ẹkụra anggẹẹrị nịnị bẹẹ, mè yi sì ịrẹyị ọza, ịrẹyị amị vị ana sị mẹẹ anka enyusẹ ana aa sụ́ ịrẹyị wagaa kẹnẹ avọọ, à vị agogo ana aa sụ́ wonyii kẹnẹ. 2 Imt 17.20; 21.21; Ịmk 11.23Òo zee eyi ma nyị ụkata dị ma zụụ kà ịsẹ, dị ma rẹ yẹ avaba ịsa oni iruvo anị nyịnẹ, ọnịrị avaba ịsa ana vọ, màa daka rẹ nyị ẹdọwụ ọnị mị zụ si zina ataba, ama mè yi sì ịrẹyị ọza, osusu kẹnẹ-kẹnẹ mị vị nị. 3Màa hyakụ nyẹngụ sị avaba ogu ọnị mị nyị mẹ ẹyịza, dị mị hyakụ zẹẹ ka à rị mị ịra nị, ama àa vị ka me yi sì ịrẹyị ọza, ẹ yị nyị ọgụ ịsị ọ vị yị mị. 4Ọza ene sì ịrẹyị ọza vị anaā nyị isuuru, dị ọ raa ngụ ayị ọza. Ọza ene sì ịrẹyị ọza, ọ mā kụ̀ ụhị. Ọza ene sì ịrẹyị ọza, ọ mā rẹ nyị irenu, ọ mā sị ẹngụ anị tụ́ ẹba. 5Ọza ene sì ịrẹyị ọza, ọ mā mẹ̀ ebira ẹnẹ ẹ̀ yị vọrọ, o mē re sì ọyịza yị ẹngụ anị ịnya kẹnẹ, ọ mā hụra kụ́ ayị, ọ mā rẹ sị ịrẹyị ọza tụ́ ịnị ịnẹ. 6Ọza ene sì ịrẹyị ọza, ọ mā jẹ, ọza àaa mẹ̀ ịsa odivi. Ọọ̄ jẹ, ọza àaa mẹ̀ ịsa ana vọrọ. 7Ọza ene sì ịrẹyị ọza, ọ mā sị ịrẹyị ọza nọ ịnị orere. Ọ rẹẹ̄ sị ayịị tụra ọza, o reē tụra eyi ịnị avaba ịsa ka aza vaa mẹ ẹtẹẹrẹ. Ọọ̄ sị ẹngụụ dọ avaba ịsa. 8Ọza ene sì ịrẹyị ọza vị ene yii sì ịrẹyị ọza pooro. Ama ụmẹ aa vẹ ọnị ọza ọ̀ yị kụkụ vaa kà ịrẹyị. Ịrẹyọyẹ ọnị ọzaā nyị rẹ vaa ta. 9Ẹ yị vị avaba ịsa ị yẹ; ịsẹ ọnị ị raa kà, ọ yị gụ. 10Ama ịhị Ohomorihi ọ raà sị ịsa ana gụ zụ yị, avaba ịsa ẹnẹ ẹ̀ yị gụ vaa ta. 11Ịjị mị vịdị vị ozweyi, ịrẹyị ozweyi mịị̄ rẹẹ kà nị, dị mị sị ịrẹyị ozweyi tụ́ ịnị ayị, di mi reē ro ariro ozweyi nị. Ama ịjị mị sị vịra, dị mị kụ́ ịrẹyị ezweyi kwooze nị. 12Ịsa oni yee re booro aanị, vị ana sị mẹẹ ọza òo rere aa zị oze ini ore re ẹtẹ wura-wura avọọ. Ama ẹkụhị ọnya, i vee re wa eyi gẹrị eyi. Booro aanị, ẹ yị nyị ịsị mị zẹẹ yẹ; ama ịhị ọnọọ, mị vaa yẹ wa ẹtẹẹtẹrẹ, anka Óhomorihi ọnị mẹ̀ yẹ mị saka-saka. 13Ịsa ana vaa yà pooro zịna-zịna ẹ vị ẹdọwụ, ọyịtureyi ọnịrị ịrẹyị ọza oyisì nị. Ịnị ịsa ẹyịta ẹnẹnị, ịrẹyị ọza oyisì o hu keekere nị.