Este domingo, en Parga, os canteiros rematan coas mans cheas de "callos"... pero dos de comer

A localidade de Parga, no municipio de Guitiriz, prepárase para celebrar este domingo a XXXI edición da Feira da Cantería, Callos e Artesanía. A alcaldesa, Marisol Morandeira, presentou un evento que se define como "un día moi completo cunha programación moi variada" deseñado para que cada visitante poida gozar do que máis lle apeteza, combinando a tradición da pedra, a gastronomía popular e diversas actividades culturais e de lecer.Guitiriz é coñecido como "o concello da pedra e da auga", e a cantería representa unha parte fundamental da súa identidade e economía. Segundo Marisol Morandeira, a pedra supuxo "un despegue económico do concello" e, tras as crises, "está a rexurdir". Para Parga, a pedra é especialmente importante, xa que a comunidade de montes local é propietaria dunha canteira que sempre foi "unha fonte de ingresos moi importante para os veciños".O evento central neste eido é o XXVIII Certame de Cantería, que repartirá 1.500 euros en premios. A alcaldesa destaca o espectáculo de ver traballar os canteiros: "Chegan pola mañá, collen unha pedra que non ten ningunha forma e sácanlle o que lles di a pedra, porque non esquezamos que son artistas, artistas da pedra". Para Marisol Morandeira, presenciar o seu traballo é algo "realmente espectacular".A gastronomía é outro dos piares da feira, cos callos como prato estrela. Aínda que a alcaldesa admite con humor non ser unha experta na súa preparación, si o é na súa degustación: "De preparalos non, pero de comelos si que son experta". Defende a convivencia entre a cociña tradicional e as novas elaboracións, pero subliña que pratos como os callos, o polbo ou o churrasco teñen entidade propia. "Nesta feira, os callos véndense por si sós", asegura.A xornada comezará cedo co traballo dos canteiros e a apertura da mostra de artesanía, que contará cunha vintena de postos de téxtil, xoiaría ou barro. O programa inclúe actuacións musicais, un pasarrúas e o Campionato Galego de Andadura. O momento máis emotivo prevese para as 13:30 horas, co pregón a cargo da antiga asociación A Raxeira de Parga, fundadora da feira, como homenaxe no seu 31 aniversario. Pola tarde, haberá un espectáculo de maxia e máis música para pechar un día no que, segundo a alcaldesa, "hai para todos os gustos".