Fernando Reyes e Mercedes Hernández, presentan o novo CD de Resonet, "Viaxe a Compostela".

Este sábado recibimos no Sombreiro a Fernando Reyes e Mercedes Hernández, do grupo de Música Antiga, Resonet. Fernando Reyes ven presentar o seu último CD, "Viaxe a Compostela. As músicas esquecidas dos camiñantes". Como nos contan no propio libreto do CD, "Moitos pereginos deixaron escritos os seus relatos, algúns deles mesmo foron publicados. Non poucos deses relatos son documentos que poden variar ou enriquecer o discurso da Historia da Música, e por extensión da Historia da civilización occidental. Os escritos dos acompañantes de Cosimo III de Medici, o diario de Gabriel Tetzel, o manuscrito de Guillaume Manier, mostran tesouros que haberá que ter en conta para comprender e disfrutar algo máis da música da cultura europea e dos espazos nos que ela tivo e ten vida". Todas estas historias achéganoslas Fernando Reyes nun Cd instrumental do que escoitaremos pezas escollidas ao longo do programa, e onde interpreta a viola de man, a tiorba e guitarras barrocas; desta volta está acompañado polos músicos Carlos Castro,Xosé Ramón Marín Martínez e Trinidad de Miguel; Mercedes Hernández leva a dirección artística do Cd, con gravados que enriquecen esta coidada e valiosísima edición