Ferrolterra mobilízase solidariamente o 21 de decembro: manifestación e mercadiño en apoio a Palestina

O vindeiro domingo, 21 de decembro, a comarca de Ferrolterra converterase no epicentro da solidariedade internacional con dúas convocatorias que buscan denunciar a situación en Gaza e recadar fondos para axuda humanitaria. A xornada comezará ás 12:00h coa manifestación comarcal baixo o lema "Ferrolterra contra o xenocidio". A marcha partirá da Praza Amada García co obxectivo de amosar o rexeitamento social á violencia e poñer "os ollos postos en Gaza", nun acto de carácter reivindicativo e denuncia colectiva. Tras a mobilización, a actividade trasladarase ao Centro Cívico de Canido, onde se celebrará o Mercadiño de Segunda Man "Ferrol con Palestina" entre as 14:00h e as 20:00h. Este evento contará cunha programación diversa: 14:00h: Apertura de postos con petiscos palestinos e sesión DJ. 14:00h a 15:00h: Obradoiro de Dabke (danza tradicional palestina). 17:00h a 19:00h: Obradoiro de pintura para crianzas. 20:00h: Sorteo de obras plásticas doadas por Suso Basterrechea e China Mandarina. Os fondos recadados durante o mercadiño destinaranse integramente a axudar a familias palestinas a través da ONG International Child Welfare, así como a apoiar o labor de Médicos sen Fronteiras en Sudán.