Gana Mafqouda - Johnny | جنة مفقودة - جوني

مهداة إلى روح: رهاف الأغا In the memory of Rehaf Al Agha 14-11-2014 http://elagha.net/person776 كان جرحي إنِّك ماتكونيش جرحي جوَّايا جوع مطبوع على ملامحي .. مزَّع فـ روحي كلّ شرايين الكلام هادر يا بحر الليل غميق هادر صحِّيت فـ قلبي كلّ شيء قادر .. يتملَّى جوَّاك فـ العدم ويموت أوام بأغرق وإيه قدامي ممكن يتمسك غير موس مصدِّي من سنين مالمستهوش مدِّيت صوابعي الخرسا عايز ألمسِك دوَّرت على وشِّك فـ ملايين الوشوش ولقيتني بأسأل غصب عنِّي عن عيونِك هُمَّا بُنِّي ولَّا سُود ولَّا لون مسحور عجيب فيه ملايكة بتبتسم.. فيه بتتنهد ورود فيه مطر حاضن لهيب حضن جوّاه بأترعش.. رعشة أطهر م السِّجود لون يجوز مالهوش وجود لون بيحيي النبض فـ عروق الرُّخام لون بيحمي اللحم من حزن الهدوم ولقيتني بأصرخ جوَّه سراديب الزحام رغم الفشل رغم الألم رغم الهموم فارس على حصانُه الورق سيفُه الخشب طقّ اتحرق قبل الهجوم فارس وحيد فجأة اتعمى والدرع من إيده اترمى إكمن حتَّى الدرع كان مسموم فارس ومات كده من سُكات من غير أنين مالهوش لزوم الدم سال ع الموس بُقع داكنة آه يا حبيبتي يا جنَّة مفقودة جوَّه البُقع شوفتِك هناك ساكنة نعسانة ولَّا فـ قبر ممدودة مالقتش غير اسمِك على لساني أربع حروف صُلبانها شايلاني أربع مجازر قلبي عايشهم على عضم روحي بدمي ناقشهم وشم لوطن مهزوم ------------ كلمات وألحان: أنطونيوس نبيل توزيع: محمد يسري وتريات: محمد يسري جيتار: طارق حمودة كولا: عبد الله حلمي ميكس وماستر: ميشيل عبد الملك