Gewister oder Frünnen?

What this episode covers

In de Religion ward je oft dorvun snackt, dat wi allns Bröder un Swestern sünd. Düsse Bröder- un Swestergeschicht is natüürli mehr in överdrogenen Sinn meent. Bilütten ward je ook in Vereene vun Bröder un Swestern snackt – bi’t Kegeln is dat so oder in Schüttenvereen. Bröder un Swestern dat schall so’n Geföhl vun Verbunnenheit utdrücken. Aha. Na denn. Ick weet je ni, wat Jüm mit ’n Swester oder Broder in’t glieke Öller opwussen sünd, vellicht hebbt Ju ook sülms twee oder mehr Kinner to Huus. Wenn dat so is: Hebbt Ju bi echte Swestern un Bröder al mol över’n längere Tied sowat as Verbunnenheit beleevt? Bi uns in’t Huus rennt je ook ’n Jung un ’n Deern rüm, de sick regelmäßi de Döörn vör de Nees toknallt. Ni mol dat Swatte ünner de Fingernogels günnt de beiden sick. Blots wenn dat gegen de Öllern geiht, verdreegt se sick mol för ’n poor Minuten. Dorno geiht dat overs ook al wieder mit Kloogschieten, sick gegensiedi argern, beschimpen un all sowat. In Oogenblick sünd de Twee mang 14 un 16 Johr jung. Dor sitt düchti Energie bin. Wat kunn man mit düsse Energie allns moken. Dor kunn man de Elvphilharmonie an sülbigen Dag op- un weller afbuun, so as ’n Zelt op ’n Campingplatz. Un dat Geslecht speelt ni mol ’n Rull: Glieks de ersten Kinner vun Adam un Eva – twee Jungs –, de Kain un Abel heeten hebbt, harrn sick so dull in de Plünn, dat dat blots een vun de beiden överlevt hett. Liekers snackt wi wieder vun Bröderlichkeit, wenn wi uns wünscht, dat wat Hand in Hand geiht. „Bröderlich mit Hart un Hand“ ward sogor in uns Natschonalhümne sungen. Haueha. Vellicht is dat de Grund dorför, dat dat so veel Arger op de Welt gifft. Wi goht dat eenfach verkehrt an. Mang Frünnen, klappt dat je tomeist veel beter mit de Verbunnenheit as mang Geswister. Frünnen kann man sick je ook utsööken. Veellicht schulln wi uns dorüm leever wünschen Frünnen statt Swestern un Bröder to ween. Na jo, op’t Letzt‘ is dat Wichtigste, dat wi uns verdreegen doht – un dat kümmt bilütten sogor ünner Bröders un Swestern vör... In düssen Sinn

PodParley-generated summary based on available episode metadata and transcript content.