Hver er Bad Bunny og hver er Ívar Ben?

Í Rokklandi vikunnar kynnumst við Jarðfræðiprófessornum Ívari Ben sem var að senda frá sér sína fyrstu plötu – og á vinyl. Hann er búinn að vera að búa til lög árum saman en svo vatt þetta upp á sig og nú er komin út plata. En í fyrri hluta þáttarins kynnumst við Bad Bunny sem vakti mikla athygli fyrir skemmtiprógrammið sem boðið var upp á í hálfleik á Superbowl í bandaríska fótboltanum síðasta sunnudag – Ofurskálinni. Þetta 13 mínútna skemmtiatriði Bad Bunny frá Puerto Rico hefur skipt fólki í fylkingar og einn af þeim sem er óánægður er foringinn í hvíta-húsinu í Bandaríkjunum sem sagði á samfélagsmiðlinum sínum að þetta atriði hafi verið eitt það versta frá upphafi skemmtiatriða á Superbowl og móðgun við mikilleika Bandaríkjanna. Þá hafi dansatriðin verið ógeðsleg, sérstaklega fyrir börnin sem horfðu á. „það skilur enginn orð af því sem þessi gaur segir“ sagði hann líka – en hann söng á spænsku sem er hans tungumál og móðurmál eins og c.a. 45 milljóna bandaríkjamanna – c.a. 13% bandarísku þjóðarinnar.