IT շաբաթ․ Նոյեմբերի 4-10-ը Հայաստանում անցկացվում է «Մեդիագրագիտության շաբաթը»

«Մեդիագրագիտությունը արհեստական բանականության դարաշրջանում» խորագրի ներքո նոյեմբերի 4-10-ը Հայաստանում տեղի կունենա «Մեդիագրագիտության շաբաթը», որը անցկացնում է Մեդիա նախաձեռնությունների կենտրոնը ՀՀ կրթության գիտության, մշակույթի և սպորտի նախարարության հետ համատեղ։ Մեդիագրագիտության շաբաթը միջազգային շարժում է, որ ՅՈՒՆԵՍԿՕ-ի գլխավորությամբ անցկացվում է ամեն տարի աշնանը՝ նպատակ ունենալով ավելի մեծ ուշադրություն հրավիրել մեդիան հասկանալու, վերլուծելու, գրագետ և արդյունավետ օգտագործելու կարևոր խնդիրների վրա։ Շաբաթվա ընթացքում կանցկացվեն պանելային քննարկումներ, վարպետության դասեր, ուսուցչական մեծ ֆորում, հանդիպումներ և դասընթացներ գրադարաններում, համալսարաններում և դպրոցներում, մարզային հանդիպումներ, նոր գրքերի և ձեռնարկների շնորհանդեսներ, մարզային հանդիպում-քննարկումներ ոլորտի փորձագետների և լրագրողների հետ։