Íþróttarabb HR // Hreyfivistkerfi: Sveinn Þorgeirsson, Snorri Örn Arnaldsson og Hafþór Aron Ragnarsson

Sveinn Þorgeirsson, kennari við íþróttafræðideild HR, fær til sín tvo góða gesti í Íþróttarabbið til að spjalla um nýja nálgun við þjálfun hreyfinga sem byggir á hugmyndum um hreyfivistkerfi, sem áður hafa verið teknar fyrir í Íþróttarabbinu (þætti 3). Þessar kenningar eru meðal kennsluefnis sem tekið er fyrir í námskeiðinu Hreyfiþróun og -nám í grunnnámi íþróttafræðinnar.Til upprifjunar, þá eru þetta hugmyndir sem saman gjörbylta sýn okkar á það hvernig hreyfingar mótast og lærast. Helsti munurinn á þessum kenningum og þeim hefðbundnu eru að í þeim hefðbundnu er einn stjórnandi og hreyfingarnar eru endurteknar til að endurtaka þær og gera „sjálfvirkar“ og festa í minninu. Hreyfingarnar gera ráð fyrir því að skynjun og hreyfing gerist hvort á eftir öðru, líkt og tölva sem fær upplýsingar, vinnur úr þeim og gefur svo svar. Hér er breytileiki milli tilrauna óæskilegur, og í raun mistök við að reyna að framkvæma réttu hreyfinguna. Hreyfivistkerfi sjá aftur á móti hreyfingar birtast út frá stöðugu og virku samspili okkar við umhverfið. Hreyfingar mótast þá af takmörkunum í umhverfi, okkur sjálfum og verkefninu. Þá er ekki hægt að endurtaka sömu hreyfinguna aftur tvisvar, og breytileikinn milli tilrauna er vísbending fyrir því að við erum aðlögunarhæf, sem er lykilhugtak í þessum pælingum. Hreyfingar birtast með samhæfingu líkamans sem flókins kviks kerfis sem er stöðugt að þróast og vinnur án eins eiginlegs stjórnanda, og því er talað um sjálfsskipulag. Til að ræða það hvernig þessar hugmyndir virka á gólfinu, í praktík fær Sveinn tvo góða gesti.  Í fyrri hlutanum ræðir Snorri Örn Arnaldsson körfuboltaþjálfari um þessar hugmyndir út frá þjálfun sem hann hefur mikla reynslu af. Talað er við Snorra um hvernig þessar hugmyndir passa inn í körfuboltaþjálfun og hvað breytist þegar að fólk tileinkar sér þessa nýju sýn á hreyfingar. Snorri talar um það svigrúm sem þarf að skapa fyrir iðkandann til að móta sinn persónulega stíl og hvernig þjálfarar geta haft áhrif á hreyfinámið gegnum verkefnið í stað þess að fara í gegnum hreyfimynstur leikamannsins sem slíks. Þær aðferðir byggjast á svokallaðri takmarkanastýrðri nálgun (constraint led approach) eða ólínulegri kennslufræði (non-linear pedagogy), en hvort um sig byggir á hugmyndum hreyfivistkerfa um myndun og nám hreyfinga. Í síðari hlutanum kemur Hafþór Aron Ragnarsson í heimsókn, en hann er forsetalistanemandi við íþróttafræðideild HR. Hafþór starfar við Hamraskóla og hefur meðal annars fengist við íþróttakennslu og því fengið að prófa þær hugmyndir sem hafa verið til umfjöllunar í vetur. Hann talar um hvernig það var að taka upp þessar nýju hugmyndir eftir að hafa tekið áfangann Hreyfiþróun og -nám. Hugmyndir hreyfivistkerfa birtast meðan annars í aðferðum sem kenndar eru við ólínulega kennslufræði en það er einmitt nálgun sem Hafþór Aron kynntist í námskeiðinu í verklegri vinnu með börnum á grunnskóla aldri. _______________________Íþróttarabb HR er þáttasyrpa innan HR hlaðvarpsins. Það er íþróttafræðideild Háskólans í Reykjavík sem heldur syrpunni úti. Í þáttunum er spjallað um hreyfingu, íþróttir, keppni, kennslu og þjálfun við gesti og gangandi í faginu. Viðmælendur koma víða að; sérfræðingar og fræðifólk, kennarar og gestafyrirlesarar, núverandi og fyrrverandi nemendur. Íþróttaiðkendur, afreksfólk og þjálfarar munu sömuleiðis koma við sögu. HR hlaðvarpið er aðgengilegt á helstu samfélagsmiðlum háskólans og streymisveitunum Spotify og Apple iTunes, ásamt hlaðvarpsveitum á borð við Simplecast, Pocket Casts og Podcast Addict. Það er samskiptateymi HR sem hefur umsjón með HR hlaðvarpinu ([email protected]). Framleiðendur hlaðvarpsins eru þeir Skúli Andrésson og Vilhjálmur Siggeirsson.