Julio Saians, parabéns!

A Audiencia Nacional arquiva ano e medio despois a causa aberta contra Júlio Saians. Todos lembramos cando hai ano e medio dous vecinos da Comarca de Trasancos, Julio Saians e a súa moza Silvia Casal foron detidos por presunta vinculación co que o tribunal de excepción español, Audiencia Nacional, chama "Resistencia galega". Daquela, os seus veciños e familiares ficaban alarmados ante o impresionante operativo policial, onde se detía a estes mozos e se lles aplicaba unha Lei de excepción coma é a antiterrorista, someténdoos a unha grave violación dos seus dereitos máis fundamentais. Sen protección legal nen asistencia xurídica estiveron durante horas, de acordo a isa Lei de excepción que lles aplicaron. O mesmo día da detención, Silvia Casal, coñecida pola súa vinculación co tecido artístico-cultural da nosa comarca, foi posta en liberdade sen ningún cargo e sen que houber ningún tipo de indicio de delicto contra dela. Iso sí, logo de ser separada do seu pequeno fillo lactante durante moitas horas. Só sabe ela da dureza e inxustiza daqueles momentos vividos que nunca xamais esquecerá, privada dos seus dereitos máis fundamentais, separada do seu pequeno. Pois ben, logo de todo ise trance de excepción, logo de ano e medio, a Audiencia Nacional vén agora de arquivar a causa aberta contra do seu compañeiro Júlio Saians a quen o Ministerio do Interior responsabilizaba das finanzas do que eles chaman "Resistencia Galega". Preguntámonos, quen vai remedar agora o inmenso dano causado a esta xoven parella da nosa comarca?. Dende os Informativos de Rádio FilispiM, aproveitamos para saúdar e enviar os nosos parabéns e ánimos a Júlio e a Silvia e, como non, ao seu pequeno, veciñas e veciños ben queridos na nosa comarca. Redacción Informativos de Rádio FilispiM.