جايز أندم - جوني 2015

اتعلِّمتْ أهرب من قلبي ومن إحساسُه اتعلِّمتْ قُصاد أحزانِك ما اتألِّمش مهما سهرتْ ومهما عيوني فـ ليلِك قاسوا اتعلِّمتْ أداري دموعي وما اتكلِّمش كُنتْ بأعيش علشان مايموتش فـ قلبي هواكي كُنتْ بأموت علشان فـ عيونِك نفسي أعيش قولتْ أعاتبِك وأعرف إيه آخرتها معاكي خوفتْ تردِّي عليَّا بضحكة وما تجاوبيش كُنتْ بأقولِّك إنِّي فـ حُضنِك بأخلق روحي وإن الرعشة فـ إيدي دي لهفة بتتمناكي كنتْ بأقولِّك إنِّي بألوِّن بيكي جروحي وإنِّي مجرد صرخة بتغرق جوَّه سماكي كان فـ لُقانا الوقت بيتعب من مشاويرنا كُنَّا بنسبق أبعد حلم ونستنَّاه وآدي طريق الشوق بيسلِّم روحُه لغيرنا وإحنا مسيرنا نفارق روحنا عشان نلقاه جايز أندَّم إنِّي فـ يوم ماقدرتش أسامحِك جايز أندَّم وأرجع أحنّْ لحُضنِك تاني جايز ألمس صورتِك لمَّا أحسّْ بجرحِك بس لا يُمكن أغنِّي بصوتِك عن أحزاني كُنتْ بأقولِّك إنِّي فـ حُضنِك بأخلق روحي وإن الرعشة فـ إيدي دي لهفة بتتمناكي كنتْ بأقولِّك إنِّي بألوِّن بيكي جروحي وإنِّي مجرد صرخة بتغرق جوَّه سماكي ----------------------------------- كلمات والحان : أنطونيوس نبيل توزيع : محمد يسري