Knööp drücken

What this episode covers

Mit de Bestelleri, dat hett je düchti tonohm‘, ne. Un allns wat no dat Bestelln to groot, to lütt, to greun, to blau oder to sünstwat is, dat ward eenfach weller trüchschickt. Dat is je ook so eenfach – man sitt to Huus op’t Sofa, bestellt sick düt un dat, un ni veel loter ward dat bröcht. Wenn dat overs no de Hannels-Multis geiht, denn bringt de Pakete in Tokunft ni mehr de Postbüddel oder ’n Paketfohrer. De Sooken schüllt bald anflogen komen – mit Drohn‘. Dor sünd se all an testen. In England hett sick annerletzt een Popkorn bestellt un 13 Minuten no dat Bestelln, weer de Krom al bi em to Huus. Tscha. Gooden Appetit, wurr ick seggen. Nu frog ick mi overs, wo genau dat gohn schall. Kloppt de Drohne, wenn se wat leevert, denn bi een an de Döör? Un wat deiht se, wenn man ni to Huus is? Flücht se denn no’n Nover un snackt mit den? Un wat, wenn man op’n Buuernhoff leevt – wo schall de Drohne denn dat Wohngebüüd vun’n Kohstall ünnerscheeden? Ni dat de Koh sick noher noch Mudders Lockenwicklers indreiht un de Bull de Zigarrn opsmökt, de eegentli för Opa to’n Gebuurtsdag weern. Un is dat ni ook gefährli? Wat, wenn sich dor een ’n Amboss bestellt hett, un ünnerwegens geiht de Drohne dat Benzin ut oder de Strom oder so? Wenn‘ so’n Amboss op’n Kopp kriegst is de Dag versaut, annerlei wat dor ’n Drohne anhangt oder ni. Ick weet ni. Ich finn dat allns ganz scheun gruseli. Wi mokt uns jümmers mehr vun Computers afhängi. Irgendwann sünd de Computers denn mi mehr för uns dor, sünnern wi ward blots noch bruukt, üm de Knööp an de Computers un Roboters to drücken, de üm uns rümwuselt. Veellicht ward wi in Tokunft je morns vun so’n Drohne afholt, denn ward wi op unsen Stohl sett, wonehm wi acht Stünnen knööp drückt, un denn flücht de Drohne uns weller no Huus oder wo se uns jüst hebben will. Nä, nä. Ick finn, wi lot‘ uns wiederhen de Post vun‘ echte Postbüddels bring‘, de ni fleegen künnt overs weet, wat de Ünnerscheed mang ’n Opa un ’n Bull is. In düssen Sinn

PodParley-generated summary based on available episode metadata and transcript content.