Lo Diari fa 15 ans !

🎂 Per festejar coma cal sos 15 ans d'existéncia, lo magazine de la cultura en occitan voliá far quicòm de novèl per el, que marcariá una novèla dralha per 15 ans de mai. Serà doncas un pòdcast, lo primièr de mai d'un format que totes abordaràn la cultura, la lenga occitana, o la cultura occitana, aquò tre 2024 ! 🎁🎙️ Dins aquel primièr ensag parlam doncas de nosautres (avèm lo dreit qu'es nòstre anniversari çaquelà), en prenent lo temps de contar un pauc l'istòria del magazine, sa tòca, son equipa, son estructuracion, en desvelant al passatge qualques secrèts de colissas... Aquò o fasèm dins la bona umor que nos anima, al micrò calorós del Guillaume Gratiolet, que quita sa casqueta d'entrevistaire papièr per tornar a sas primièras amors radiofonicas. Enfin, aprèp racontes, anecdòtas e sovenirs de cronicaire·as entremesclats de cacalasses, rendètz-vos en fin d'episòdi per qualques mots sus nòstres projèctes pels 15 ans que començan ! 😎👉 Animat per Guillaume Gratiolet, amb en platèu Danís Chapduèlh, cap-redactor del Diari, Cathy Lacroix, directritz de l'IEO OPM e Eric Fraj, president de l'IEO OPM e director de publicacion del Diari ; puèi per telefòne Sebastian Pugin, fondator e ancian cap-redactor del Diari, e Carolina Dufau, Miquèu Pujòl, Cecila Chapduelh, Matieu Poitavin, Francesa Truflandier, Anne-Pierre Darrées, Capitani Lemosin e Joan Carles Codèrc, cronicaires e legeires de la revista. ✍️🙏 Lo Diari e l'IEO OPM son sostenguts per la Region Occitània, la Delegacion Generala a la Lenga Francesa e a las Lengas de França, la DRAC Occitània, la Comuna de Tolosa, l'Ofici Public de la Lenga Occitana e un fum de personas que legisson, escotan e sostenon la cultura, en occitan. Mercés a eles, elas e vos ! 🙏Soutenez-nous sur helloasso.com !