Mabuting Balita l Abril 24, 2023 – Lunes

Mabuting Balita l Abril 24, 2023 Lunes sa Ika-3 Linggo ng Pasko ng Muling Pagkabuhay Ebanghelyo: Jn 6: 22-29 Napuna ng mga taong nakatayo sa kabilang ibayo ng lawa na walang bangka noon sa lugar na iyon kundi isa lang at hindi sumakay si Hesus sa bangkang ito kasama ang kanyang mga alagad. Ngunit ang ilang malaking bangkang galing Tiberias ay dumating malapit sa lugar na kinainan nila ng tinapay sa pagpapasalamat ng Panginoon. Kaya nang mapuna ng mga tao na wala roon si Hesus at ang mga alagad niya, sumakay sila sa mga bangka at pumunta sa Capernaum para hanapin si Hesus.Nang matagpuan nila siya sa kabilang ibayo ng lawa, sinabi nila sa kanya, “Guro, kailan ka pumarito?” Nagsalita sa kanila si Hesus at sinabi: “Talagang-talagang sinasabi ko sa inyo, hinahanap ninyo ako hindi dahil sa nakita ninyo sa mga tanda kundi dahil sa tinapay na kinain ninyo at kayo ay nangabusog. Magtrabaho kayo, hindi nga para sa pagkaing nasisira kundi para sa pagkaing nananatili at nagbubunga ng buhay na walang hanggan. Ito ang ibibigay ng Anak ng Tao sa inyo; siya nga ang tinatakan ng Diyos Ama.” “Ano ang matatrabaho namin para maisagawa ang mga ipinagagawa ng Diyos?” “Ito ang ipinagagawa ng Diyos: maniwala kayo sa sinugo niya.” Pagninilay: Mula sa panulat ni Sr. Kayla Ventura ng Daughters of St. Paul ang pagninilay na ibabahagi ko sa inyo.  Mga kapanalig, pinapaalalahanan tayo ng Ebanghelyo ngayon na balansehin ang pagtugon natin sa ating pisikal at materyal na pangangailangan, at sa ating espiritwal na pagkagutom.  Habang busy tayong magtrabaho para matugunan ang pangunahing pangangailangan ng ating pamilya, sa pisikal at materyal na aspeto; huwag din nating kaliligtaang punan ang ating espiritwal na pangangailangan, ang ating pangangailangan sa presensiya ng Diyos.  (Kung inaalagaan nga natin ang ating katawan para manatiling malusog, ganun ding pag-aalaga ang gawin natin sa ating kaluluwa.)  Sa aking karanasan bilang isang estudyante, may mga pagkakataong bising-busy ako sa magdamagang pag-aaral para maka-submit ng mga requirements.  Kailangang pag-isipang maigi ang bawat gagawing papel, lalo na sa Philosophy subject. Iba pa dyan ang mga nakatokang gawain bilang estudyanteng madre.  Kaya inaamin kong naapektuhan talaga ang aking spiritual life. Minsan nga, hindi na ako makadasal o di kaya tulog sa dasal.  Kaya dumarating sa punto na pakiramdam ko parang kulang ng sigla ang buhay at hindi ako makafocus. Inaral naman ang lahat pero hindi pumapasok. Nakakalimutan ko, na ang source ng knowledge ay ang Panginoon mismo. Na ang pag-aaral pag sinabayan ng pagdarasal at tiwala sa grasya ng Diyos, siguradong successful ang lahat. Madali at magaan dalhin ang bawat pagsubok. Kapanalig, hindi porket busy sa pag-aaral o sa ano mang gawain, kakalimutan na natin ang Diyos. Kelangan din nating hanapin Siya at maidulog ang ating mga sarili sa Kanyang awa at grasya. Ika nga; our seeking must ultimately be directed towards God; it cannot stop at or be satisfied with anything less.