Mabuting Balita l Setyembre 3, 2023 – Linggo ng Ika-22 Linggo sa Karaniwang Panahon

Mabuting Balita l Setyembre 3, 2023 – Linggo ng Ika-22 Linggo sa Karaniwang Panahon #MabutingBalita #DaughtersOfStPaulPhilippines #PaulinesPH  Ebanghelyo:  Mateo 16:21-27 Ipinaalam ni Hesukristo sa kanyang mga alagad na kailangan siyang pumunta sa Jerusalem: pahihirapan siya ng mga Matatanda ng mga Judio, ng mga Punong-pari at ng mga guro ng Batas. Papatayin siya at muling babangon sa ikatlong araw. Dinala naman siya ni Pedro sa isang tabi at sinimulang pagsabihan: “Huwag sana, Panginoon! Hindi ito pupuwede.” Ngunit hinarap ni Hesus si Pedro at sinabi sa kanya: “Sa likod ko Satanas! At baka mo pa ako tisurin. Hindi sa Diyos galing ang iyong iniisip kundi mula sa tao.” At sinabi ni Hesus sa kanyang mga alagad: “Kung may ibig sumunod sa akin, itakwil ang kanyang sarili at kunin ang kanyang krus upang sumunod sa akin. Sapagkat ang naghahangad na magligtas ng kanyang sarili ang mawawalan nito ngunit ang naghahangad na mawalan nito ang makakatagpo nito. Ano ang pakinabang ng tao tubuin man niya ang buong daigdig kung sarili naman niya ang mawala? Sa ano maipagpapalit ng tao ang kanyang sarili? Darating nga ang Anak ng Tao taglay ang kaluwalhatian ng kanyang Ama at kasama rin ang kanyang mga banal na Anghel, at doon niya gagantimpalaan ang bawat isa ayon sa kanyang mga gawa.   Pagninilay: Sa ating Mabuting Balita ngayon, ipinahayag ni Hesus ang kanyang paghihirap, kamatayan, at muling pagkabuhay sa kanyang mga alagad. Makikita natin dito ang dalawang mahahalagang aral na maaari nating gamitin sa ating buhay bilang mga Kristiyano.  Una, tungkol sa pagsunod sa kalooban ng Diyos. Nang marinig ni Pedro ang sinabi ni Hesus hindi niya matanggap na ang kanyang Panginoon ay magdurusa at mamamatay. Pero sinabi ni Hesus kay Pedro na siya ay nag-iisip ayon sa mga bagay ng tao, at hindi sa mga bagay ng Diyos. Bilang mga alagad ni Hesus, tinatawag tayo na sumunod sa kanyang halimbawa at tanggapin ang kanyang kalooban para sa atin. Hindi natin dapat ipaglaban ang ating sariling gusto o interes, kundi magtiwala sa kanya, na may mas mainam na layunin siya para sa atin. Ikalawa, tungkol sa pagpapasan ng ating krus. Sinabi ni Hesus sa kanyang mga alagad na kung sino man ang nagnanais na sumunod sa kanya, dapat itakwil niya ang kanyang sarili, pasanin ang kanyang krus, at sumunod sa kanya. Ang pagpapasan ng krus ay hindi lamang tungkol sa pagtitiis ng mga hirap o problema, kundi pati na rin sa pag-ibig at paglilingkod. Ang bawat isa sa atin ay may iba’t ibang uri ng krus na dapat dalhin: maaaring ito ay isang sakit, isang pagsubok, isang responsibilidad, o isang hamon. Ang mahalaga ay hindi natin ito dalhin nang mag-isa, kundi kasama si Hesus na siyang nagbigay ng halimbawa at lakas para sa atin. Mga kapanalig, nawa’y maging inspirasyon natin ang salita ng Diyos upang sumunod kay Hesus nang may pananampalataya at pag-asa. Amen. - Fr. Rolly Garcia Jr. | Director, Biblical Apostolate - Archdiocese of Manila