Moeche celebra a VIII Feira do Queixo con 67 expositores e unha xornada previa con foliada e queixería convidada

O castelo de Moeche acolleu a presentación da VIII Feira do Queixo, que se celebrará este domingo no recinto feiral con 67 expositores. Como novidade, este ano haberá unha xornada previa o sábado coa inauguración oficial, a presentación da queixería convidada —Temia, de Asturias— e a celebración da I Foliada do Queixo. O domingo abrirán os postos de exposición e venda, entre os que haberá 35 queixerías de Galicia e doutros puntos do Estado, ademais de produtos internacionais procedentes de Italia, Suíza e Francia. A feira contará tamén co Mercado de Artesanía Agroalimentaria da Deputación da Coruña, baixo a marca “A paisaxe que sabe”. Haberá degustacións, obradoiros infantís, catas comentadas, música e demostracións culinarias, ademais do Tren do Queixo gratuíto desde Ferrol.