Mon Fernández presenta as súas prioridades para Ferrol: vivenda, patrimonio, mercados, transporte e unha «voz propia»

O candidato do BNG á alcaldía de Ferrol, Mon Fernández, defendeu en Voces de Ferrol, de Radio Voz, a necesidade de que a cidade teña «voz propia» e coloque as persoas no centro das políticas municipais. Fernández, que afrontará por primeira vez unhas eleccións municipais tras seis anos como deputado no Parlamento de Galicia, asegurou que o BNG aspira a gobernar Ferrol e reivindicou a experiencia municipal da formación. Entre as súas prioridades citou a recuperación e posta en uso do patrimonio municipal, a revitalización dos mercados e do comercio de proximidade, a vivenda pública e a rehabilitación de Recimil. Tamén reclamou melloras no transporte e nas conexións ferroviarias con A Coruña, ademais da retirada das liñas de alta tensión de Caranza. Fernández defendeu igualmente recuperar o proxecto para que Ferrol sexa Patrimonio da Humanidade e considerou necesario avanzar na apertura da cidade ao mar, aínda que vinculándoa á solución das carencias básicas de infraestruturas. Sobre o mercado da Magdalena, apostou por dialogar cos praceiros e abordar conxuntamente a situación dos tres mercados municipais. O candidato confirmou ademais que, se resulta elixido alcalde, deixará automaticamente a súa acta de deputado autonómico e asegurou que a súa intención é dedicarse en exclusiva á política municipal.