Nga “The Voice Kids” tek publikimi i “Harroje”, Rea Nuhu ndërton me guxim rrugën e saj artistike: “Jam më gati se kurrë”!

Këngëtarja Rea Nuhu ishte e ftuar në emisionin “Back to the Beginning” me Kozeta Kurtin në Top Albania Radio, ku ndau me dëgjuesit rrugëtimin e saj në botën e muzikës. Gjatë bisedës, Rea foli për fillimet e saj artistike, ndikimet muzikore që e kanë formësuar dhe vendosmërinë për të ndërtuar një karrierë autentike në një industri sfiduese. Ajo tregoi se për të, muzika ka qenë gjithmonë një mënyrë e natyrshme shprehjeje, një gjuhë me të cilën ka komunikuar emocionet më të thella dhe përvojat personale.