नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे -------------------

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे ---------------------------------- 🙏🙏 नमस्कार माहरा 26.01.2022, माघ (माघ) गटॖ पछॖ (कृष्ण पक्ष) नवम (नवमी) ब्वदॖवार (बुधवार), श्री सप्तर्षि सम्वत 5097, नक्षत्र स्वात, राश वृश्चिक (रऻच़ हॖन्ज़ि 03.12 बजि प्यठॖ) ऋतु शिशर (चलान) ********************** त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव ********************** महामऻरी नाश - मंत्र जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते ********************** कति ॴस्य तॖ कॊत वऻत्य। कॗत्य ॴस्य तॖ कॗत्य रूद्य। तीज़मालि वॊन बरादरस। माधव जुवॖन्य कथ वन मऻजी ब्रोंहकुन। बरादरन वोन तीज़मालि। वाय तस्सॖन्ज़ॖय कथ प्यॆयम राथ च़्यतस। बूज़मुत छुम ज़ि कऺशीरि मंज़ यॆलि कबऻल्य रेडॖ गव कॆंह लूख आयि वरमुलि, सोपोरॖ, वोरि, प्यठॖ च़लिथ श्रीनगर शहरस कुन ज़ुव बचावनॖ म्वखॖ। दफॖ असि कऻशिर्य बटन छि विज़ि विज़ि च़लॖ लार रूज़मॖच़। बरादरन वॊन मऺन्ज़्य तीज़मालि। आहनबा ति छुय पॊज़। ॳस्य मा ज़ानॖहऻव वापस वार करुन या ठॊलि युन। सऻन्य संस्कार मा ॴस्य तिथ्य। सान्यव परद्यव तुल अम्युक नाजऻयिज़ फऻयिदॖ तॖ असि बटन आयि प्रथ विज़ि गुर करान तॖ ॳस्य ति रूद्य यि च़ॊक मॊदुर च़ालान। गरा बटॖ लूठ तॖ गरा कबऻल्य लूठ। ॳस्य आयि ह्यनॖ गरा शेर बऺकरन मंज़ तॖ गरा मोयि मुक्कदस चि लडायि मंज़ या परमेश्वरी हॖन्दिस कान्डस मंज़। सोन तब्कॖ ओस पॊरमुत ल्यूखमुत तब्कॖ। शऻयिस्तॖ तॖ संस्कऻर्य कौम। सुय ओस म्यॆ छु बूज़मुत अख ख़ास वजह ज़ि कऻशरिस बटस आव पंडित वननुक ख़ताह दिनॖ तॖ अज़ ताम छि यि अख प्रज़नथ असि पानस सॗत्य। बरादरन च़ऺट कथ मंज़य तॖ वॊनुन तीज़मालि मऻजी च़ॖति वऻच़ॖख दंदॖ दादि प्यठॖ चीन। नबा यिम छना मंज़्य कॆंह कथॖ प्यवान याद तॖ बदलेमॖत्य हालात वुछिथ छु दिलस तोस ह्यु व्वथान। माधव जुव भट्ट ओस दपान तमि वख्तॖ प्यठॖ कनिकऻदलॖ ॳकिस किरायि मकानस मंज़ रोज़ान। पानॖ दपान ओस मैट्रिक पास तॖ अदालॖच़ मंज़ ओस मा कऻम करान। ॳम्यसॖय ॴस्य सथ शुर्य दपान ज़ॖ कोरि तॖ पांछ़ न्यॆचिव। कथ छि जऻरी ********************** कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव """"""""""""""""""""""""""""""""""" कऺशीर - नेहरु पार्कि किस तथ होटलॖकिस च़ऺकिस तलॖ युस ज़्यूठ बोट रेस याने दोरनावनॖचि कामि लागनॖ ओस यिवान तथ रेसि याने तथ दोरि मूकाबलस ओस नाव "रिगेटा"। अथ जायि ॴस्य वनान गगरीबल यॆतिनस यिम बोट ठहरावनॖ ॴस्य यिवान। मिशन स्कूल, रंगॖटेंग स्कूलॖ अलावॖ दपान ॴस्य रॗन्यवारि हरीसिंह हाई स्कूल, बिस्को म्यमोरियल स्कूल, डी ए वी स्कूलॖक्य लऺडकॖ ति शऺमिल। चपव सॗत्य ॴस्य बोट लमान तॖ करान ॴस्य मान मान। ॳकिस ॳकिस बोटस मंज़ ॴस्य आसान च़्वदह या शुराह लऺडकॖ। दपान तिमनॖय लऺडकन ॴस्य दिवान शिरकत करनॖ यिमन छ़ान्ठ ॴस तगान वायिन। छ़ान्ठ ॴस्य शुर्य कऺशीरि मंज़ पऻन्य पानय व्यतस्तायि मंज़ मुफ्तस मंज़ ह्यॆछान रोज़ान। अज़कल छि स्विमिंग पूलन मंज़ सासॖबऺद्य रॊपियि खर्चऻविथ पनॖन्यन शुर्यन छ़ान्ठ वायिन्य ह्यॆछनावान। यि रिगेटा वुछनॖ बापथ ॴस्य लूख बुल्वाड रोडॖ प्यठॖ तमाशॖ वुछान रोज़ान तॖ च़रिपॊप वऻय वऻय लऺडकन हुन्द मनोबल बऺडरावान रोज़ान। यॊत ताम म्यॆ ज़्वन छु यि रिगेटा मुकाबलॖ ओस व्यतस्तायि मंज़ ति हावनॖ यिवान। मगर व्वंय गव सम्याह अख यिथ्य मुकाबलॖ वुछिनस। यिमन बोटन ओस आसान ब्यॊन ब्यॊन रंग कऺरिथ, पनॖनि पनॖनि स्कूलुक नाव लीखित तॖ लऺडकन स्कूलॖच वर्दी लऻगिथ। मोटर लांच ओस सॗत्य सॗत्य पकान रोज़ान मुकाबलस निगरऻनी करान रोज़ान। वाह क्याह नज़ारॖ ओस आसान। कॊत गव सु दौर। कोत लऺग्य ॳस्य योर ********************** नऺविव तॖ फॊलिव भूषण कौल "दीप" (बूज़िव ॳज़्युक सबक़ म्यानि ज़्यॆवि ति) (यि सबक़ वुछिव podcast दऺस्य ति) https://anchor.fm/bldeep (यि सबक़ वुछिव koshursabak.blogspot.com प्यठॖ ति)