नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे -------------------

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे ----------------------------------- 🙏🙏 नमस्कार माहरा 22.02.2022, फागुन (फाल्गुन) गटॖ पछॖ (कृष्ण पक्ष) शॆयम (षष्ठी) बॊम्वार (मंगलवार), श्री सप्तर्षि सम्वत 5097, नक्षत्र स्वात, राश तुला (चलान) ऋतु शिशर (चलान)...अज़ छि हुर्य शॆयम ********************** त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव ********************** महामऻरी नाश - मंत्र जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते ********************** यिमन द्वन शुर्यन ॴस अकि ऱयतॖच फरॖख पानॖवॖन्य। तीज़मालि वॊन बरादरस। दपान यिम द्वश्यवय शुर्य आमॖत्य ॳस्य रछनॖ बडॖ नज़ाकतॖ सान। आहनी मऻजी दपान तमि वख्तॖ ओस शुर ज़्यवान माजि तॖ रछान ॴस नान्य। मऻलिस ॴस नॖ परेशऻनी आसान शुर ज़्यनॖ पतॖ सॊ ज़िम्वऻरी ओस ह्यवान बऺड्यबब। याने शुरिस ॴस्य सऻरी ल्वलॖमतॖ लाय करान रोज़ान। अकि ख्वनि वालान तॖ अकि ख्वनि खारान। बरादरन वॊन तीज़मालि। तिहाबा छुय पॊज़। यि छा अज़कलुक माहोल। शुर छुनॖ माजि मऻलिस बगऻर परज़ॖनावान ब्यॆयि कऻन्सि तॖ गछ़ान नॖ ब्यॆयि कऻन्सि निश। म्यॆ छु याद प्यवान ज़ि प्रानि वख्तॖ ओस स्यज़र यूत ज़ि शुरिस ओस च़ाटॖहालस मंज़ मऺल्यसॖन्ज़ि जायि बॖड्यबब पनुन नाव लेखनावान। पतॖ ॴसॖ मऻलिस खसान हॊदॖहऺर यि नाव बदलावान बदलावान। बरादरन वॊन। आहनबा ज़यादॖ कशनस छु ज़्यादॖ रथ यिवान। असुनाह कॊर बरादरन तॖ तीज़मालि ति। कथ छि जऻरी। ********************** कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव """"""""""""""""""""""""""""""""""" कऺशीर - हेरच़ प्यठ ओस हारन गिन्दनुक चॆश्यकॖ प्रथ ॳकिस रोज़ान। बऺड्य ल्वकॖट्य नऺव्य प्रऻन्य न्वशि कोरि ॴस्य सऻरी पनॖन्य ग़म ग़ोसॖ मऺशरिथ इकॖवटॖ समान तॖ हारन गिन्दान। गिन्दान गिन्दान यॊदवय त्रॆ हारॖ प्यॆहऻन बुथ ह्यॊरकुन कऺरिथ तथ ॴस्य वनान ट्यकॖर, यॊदवय अकॖय प्यॆहिये तथ ॴस्य वनान कुन्य याने सु हारॖ बाज़ ॴस्य पूरॖ ज़ेनान तॖ यॊदवय नॖ कॖंहॗयि हार बुथि फेरिहे तथ ॴस्य वनान छॊत। यिथय पाठ्य ॴस्य गिन्दान रोज़ान जुफ ताकस। हारॖ टिंचन ति ॴस्य गिन्दान रोज़ान। नव्यन न्वश्यन सॗत्य ओस हारन गिन्दनस स्यठाह मज़ॖ यिवान। गिन्दान गिन्दान ओस फिकिरी तरान ज़ि न्वश छा रलवॖन्य मेलवॖन्य किनॖ ॳन्दरुहमल। हारन गिन्दान गिन्दान ओस तू तू मैं मैं ति गछ़ान रोज़ान मगर सु ओस रोज़ान बस कॆंच़स कालस। मगर व्वंय छॆ नॖ तिम हारॖ मेलान, न छि तिम गिन्दन वऻल्य मेलान, न सॊ संगथ तॖ न रूज़ व्वंय सॊ रंगथ। न शुर्यन हॖन्ज़ सॊ पंगथ व्वंय नज़र यिवान ********************** नऺविव तॖ फॊलिव भूषण कौल "दीप" (बूज़िव ॳज़्युक सबक़ म्यानि ज़्यॆवि ति) (यि सबक़ वुछिव podcast दऺस्य ति) https://anchor.fm/bldeep (यि सबक़ वुछिव koshursabak.blogspot.com प्यठॖ ति)