नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे -------------------

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे ---------------------------------- 🙏🙏 नमस्कार माहरा 02.03.2022, फागुन (फाल्गुन) गटॖ पछॖ (कृष्ण पक्ष) मावस (अमावस्या) ब्वदॖवार (बुधवार) श्री सप्तर्षि सम्वत 5097, नक्षत्र शत, राश कुम्भ (चलान) ऋतु शिशर (चलान), द्रठपऻन्च़ुक (पंचक) (चलान).वटुख परिमोज़ुन छु पगाह याने 03.03.2022 ********************** त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव ********************** महामऻरी नाश - मंत्र जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते ********************** दपान सऻम्पकुजि ओस रॊटमुत वऺटिस मंज़ अख कुनाह तॖ कॊरमुत ओसुन गरॖ हवालॖ न्वश्यन। तीज़मालि वॊन बरादरस। आहनी मऻजी त्र्यॆ न्वशि ॴसिथ कथ ॴसॖस गरॖ कऻम पानॖ करॖन्य। बरादरन वॊन वापस तीज़मालि। आहनबा ति छु पॊज़ दफ अमा पॊज़ असि कऻशिर्य ज़नान ओस नॖ नरि ज़ंगॖ वऺटिथ बिहिथ वार यिवान। शुर्यॆ यीत्य यीत्य आसनॖ पतॖ ति आसॖ ज़नानॖ गरस मंज़ जखान रोज़ान। दपान सऻम्पकुजि मा ओस कर ताम यॆन्दॖर ऒनमुत तॖ ॴस मा कुनि कुनि सातन यॆन्दॖरॖ तुलिस ज़ीर ज़ीर दिवान रोज़ान। तीज़मिलि वॊन बरादरस। म्यॆ प्यव ज़्वन च्यऻन्य यि कथ बूज़िथ ज़ि म्यऺन्य मऻज्य ति ॴस वख अकि यॆन्दॖर चलावान रोज़ान। बरादरन वॊन तीज़मालि। आहनबा तमि वख्तॖ छु ओसमुत यिमन चीज़न हुन्द रिवाज दफ प्रथ गरस मंज़। कंज़स मंज़ दानि मुनुन, व्वज़ॖल्य हॊख्य मर्च़ॖवांगन कंज़स मंज़ दगॖन्य, यॆन्दरस प्यठ फम्ब कतुन, शुपि सॗत्य त्वमुल छ़टुन, कन्नॖ तॖ श्युर ब्यॊन ब्यॊन कुन, परिनिस मंज़ ओट छानुन, ग्रटस मंज़ कॖनॖख या म्वन्ग पिहुन, फ्यरनॖच डूर बनावॖनॖ बापथ यॆन्य वाहरावॖन्य, न्यामि मंज़ दऺजमॖच़ मछ़ ज़ऻविज बनावॖन्य, कम कऻम ॴस नॖ ज़नान आसान तमि पतॖ ति आसॖ नॖ दायन अथि बानॖ छलनावान या कुठ्यन डुवनावान। कऺशीरि मंज़ ओस नॖ दायन याने मेड थावनुक रिवाज। कथ छि जऻरी ********************** कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव """"""""""""""""""""""""""""""""""" कऺशीर - अज़ छि डून्य मावस। कऺशीरि मंज़ ॴस्य दपान ॳज़्यकि दॊह ॴस्य डून्य परमोज़ान याने कॆंह च़्वचॖवऺर्य बनावान तॖ वटुक राज़ॖ सॖन्द्यव बानव मंज़ॖ कॆंह डून्य कऺडिथ तिमन प्रेप्युन हावान। यि ओस बनान नवीद तॖ ॴस्य बऻगरावान गरिक्यन बऻच़न मंज़। यिथॖपऻठ्य ओस वातान अंद यथ त्यौहारस। यि प्रथा छि वुन्यखताम चलान आमॖच़ तमी त्रायि। दफ अमापॊज़ मतभेद छु रोज़ान तिथियस प्यठ मंज़ॖ मंज़ॖ ज़ि अज़ छा परमोज़ुन किनॖ पगाह। द्वयव शास्त्री जियव छि हऻव्यमॖत्य ब्यॊन ब्यॊन तिथि दपान। मनऻयिव तॊह्य तहि अज़ या पगाह याने यॆमिस यिथॖपऻठ्य व्यस्तार यी। वनच्यन यार्यन ख्वदायि सुन्द सग। ********************** नऺविव तॖ फॊलिव भूषण कौल "दीप" (बूज़िव ॳज़्युक सबक़ म्यानि ज़्यॆवि ति) (यि सबक़ वुछिव podcast दऺस्य ति) https://anchor.fm/bldeep (यि सबक़ वुछिव koshursabak.blogspot.com प्यठॖ ति)