नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे -------------------

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे ----------------------------------- 🙏🙏 नमस्कार माहरा 03.03.2022, फागुन (फाल्गुन) ज़ूनॖ पछॖ (शुक्ल पक्ष) ऒक्दॊह (प्रथमा/प्रतिपदा) ब्रसवार (गरूवार/वीरवार/ब्रहस्पतवार) श्री सप्तर्षि सम्वत 5097, नक्षत्र पू.भा, राश मीन (रऻच़ हॖन्ज़ॖ 08.03 बजि प्यठॖ), ऋतु शिशर (चलान), द्रठपऻन्च़ुक (पंचक) (चलान)...अज़ छु वटुक परॖमूज़ुन ********************** त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव ********************** महामऻरी नाश - मंत्र जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते ********************** चूंकि बाबी ॴस ब्यॆयि ज़ुवॖ दॊयिमि न्वशि याने प्यारी ओस चोकॖ सम्बोलमुत तॖ बाबी ओस गॊब चीज़ तुलुन मन्ना। अवॖ म्वखॖ ॴस बाबी ल्वकॖट म्वकॖट कऻम करान रोज़ान तॖ त्रॆयिम न्वश याने छोटी ॴस पलव दलव छलान छॊकान, कुठ्यन मंज़ डुवान शेरान तॖ बानॖ सुरवान। तीज़मालि वॊन बरादरस। बरादरन वॊन तीज़मालि ज़ि मऻजी म्यॆ छु बासान ज़ि तमि वख्तॖ आसॖ नॖ पलव-छलन वाजि याने वाशिंग मऺशीनॖ। हय नबा तमि सातॖ ओस नॖ यिमन मशीनन हुन्द नावॖय बूज़मुत। अथव सॗती ॴस्य तगार्यन मंज़, चिलमचीयन मंज़, टबन मंज़ यिवान पलव छलनॖ। गरम पलव याने यॆरॖव बऺन्यानॖ, पटिव पलव, फलालऻनिक फ्यरन, पतलून, दराज़ॖ, कऺमीज़ॖ वगैरा वगैरा। हय कॆंह मॖ प्रॖछ़। अथॖ ॴस्य वऺसिथ प्यवान। सॗत्य ह्यथ आसॖ आसान लेफूरि, शांदगऺन्ड्य वोरि, करॖच़, मसनन्दॖ, पोछ़, दोति, प्येटीकोठ वगैरा वगैरा। पलव छलान छलान ॴस यॆसॖर यिवान। अल्बतॖ अख राहत ॴस आसान। क्याह सना हिश। प्रुछ़ बरादरन। यकुत, समुत तॖ एहसास ओस। जवाब द्युत तीज़मालि। ऒमूमन ॴस्य मॊट्य पलव यारबलॖ गऺछ़िथ छलान रोज़ान। यिमन नॖ यारबल नऺज़दीक ओस आसान तिम ॴस्य गरन मंज़ॖय छलान छॊकान रोज़ान। साबन ति ॴस आसान दीसी। केंच़न पलवन ओस यिवान मायि करनॖ। मस्लन पूच़, ज़ुज्य, साफॖ, कऺमीज़ॖ, पऻजामॖ वगैरा। अनिमॖ ओस यिवान इस्तिमाल करनॖ मायि बजाय। वॊन तीज़मालि। कथ छि जऻरी ********************** कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव """"""""""""""""""""""""""""""""""" कऺशीर - ज्यॆमिस मंज़ बिहिथ द्वयव ज्योतिष्याचार्यव याने सर्वश्री ओंकार नाथ, भूषण लाल अकि तरफॖ तॖ श्री पुनीत जी दॊयिमि तरफॖ छि अज़कल लऺगिथ असि कऻशिर्य बटन वथ हावनॖ बजाय वथ रावरावनस मंज़ म्यॆ बासान। जन्त्री तयार करनस मंज तिमन द्वन पानॖवुन्य कुनी कथ न आसनॖ म्वखॖ रूद्य ॳस्य विज़ि विज़ि दु-च़्यॆतिस मंज़ ज़ि कुस दॆह कमि दॊह यी। यिथिस माहोलस मंज़ छि सऻरी पनुन पनुन तरक थऺविथ ॳस्य अख ॳकिस ब्रऺमित करान रोज़ान। डून्य परॖमूज़नस मंज़ ति छि रातॖ प्यठॖ सऻनिस समुदायस मंज़ हल चल हिश मचेमॖच़। अड्यव परमूज़ राथ वटुक ति क्याज़ ओंकार नाथन ओस होवमुत राथ। ॳड्य परमुज़न अज़ ति क्याज़ि पुनीत जियन छु होवमुत अज़। म्वखसरॖ प्यव असि पानय वुछुन ज़ि कऺह्य प्यव गज़। ॳस्य बटॖ छिनॖ ह्यकान लऺमिथ कुनी रज़। सऻरी छि पनॖनिस पनॖनिस मज़स मंज़। ********************** नऺविव तॖ फॊलिव भूषण कौल "दीप" (बूज़िव ॳज़्युक सबक़ म्यानि ज़्यॆवि ति) (यि सबक़ वुछिव podcast दऺस्य ति) https://anchor.fm/bldeep (यि सबक़ वुछिव koshursabak.blogspot.com प्यठॖ ति)