नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे -------------------

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे ----------------------------------- 🙏🙏 नमस्कार माहरा 11.03.2022, फागुन (फाल्गुन) ज़ूनॖ पछॖ (शुक्ल पक्ष) नवम (नवमी) शॊकुरवार (शुक्रवार/जुम्मा/भार्गववार) श्री सप्तर्षि सम्वत 5097, नक्षत्र मृग, राश मिथुन (चलान), ऋतु शिशर (चलान) ********************** त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव ********************** महामऻरी नाश - मंत्र जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते ********************** माधव जुवुन गरॖ ओस गंगॖबोय याने गंगाराम ब्रह्मुण अक्सर यिवान रोज़ान। तीज़मालि वॊन बरादरस। तऺमिस क्याह सना कऻम ॴस आसान अति मऻजी। प्रुछ़ बरादरन तीज़मालि। ख़बरहाबा च़्यॆ ज़्वन छुया असि कऻशिर्य बटन ॴस्य कऺशीरि मंज़ पनॖन्य पनॖन्य ब्रह्मण गऺन्डिथ आसान। आहनी मऻजी म्यॆ छु पूरॖ ज़्वन तिमन ॴस्य वनान ॳस्य क्वलॖ-ब्रह्मण। च़्यॆ भगवान ऒरज़ुव थवुन। सुय क्वलॖ-ब्रह्मुण ओसमुत ओस गंगॖबोय याने गंगाराम। माधव जुव ओस यिवान मानॖनॖ यॆज़मन तॖ माधव जुवुन गरॖ गऺयो यॆज़मन गरॖ गंगाराम सॖन्दि बापथ। तीज़मालि वॊन बरादरस। यि प्रथा हाबा छि ॴसमॖच़ वारियाह कालॖ प्यठॖ कऺशीरि मंज़ चलान। कऺशीरि मंज़ ॴस्यमॖत्य ॴस्य दपान ज़ॖ तबकॖ याने ब्रह्मण परिवार तॖ यॆज़मनॖ गरॖ। माधव जुवुन गरॖ दपान ग्वडॖ ग्वडॖ यिवान ओस म्वकुन्द राम याने मऻन्कॖ जुव तॖ तऺम्यसॖन्दि स्वर्गॖवास गछ़नॖ पतॖ ओस तऺम्यसुन्द न्यॆचुव गंगाराम यिवान रोज़ान। तीज़मालि वॊन बरादरस। करान क्याह ओस गंगाराम माधव जुवनि गरि। प्रुछ़ बरादरन तीज़मालि। यि ब्रह्मण दपान ओस ज़ातक बनावान तिमन शुर्यन हॖन्द्य यिम यॆज़मन सॖन्दि गरि ज़न्मस यिहऻन। तीज़मालि वॊन बरादरस। तिमन शुर्यन हॖन्दिस वॊहरवऻदिस प्यठ ओस यि ब्रह्मुण यिवान तॖ पूज़ा करान तॖ तहरि प्रेप्युन हावान। यॆज़मन ओस ॳमिस ब्रह्मणस यि कऻम याने यि पूज़ा पाठ करनॖ पतॖ दक्षणा दिवान रोज़ान। ब्रह्मणस तॖ यॆज़मनस ओस वख अकि स्यठाह सॊन तॖ गॊन सम्बंद मगर यि सम्बंद गव वारॖ वारॖ फुटान तॖ दूर्यॆर गव बडान। यि दूर्यॆर बड्यव यूत ज़ि क्वल-ब्रह्मण प्रथा गऺयि गऻबॖय। यि व्यछ़य छि अज़कल च़्येनान ॳस्य सऻरी मगर ज़्यव छि बंद तिक्याज़ि यि प्रथा बंद गछ़नस छि ॳस्य पानॖ ज़िम्मॖवार। किथकऺन्य। यि सवाल कॊर बरादरन तीज़मालि कुन। कथ छि जऻरी ********************** कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव """""""""""""""""""""""""""""""""" कऺशीर - यथ हफ्तस थख कऺरिथ यी पतॖ हूल्य याने होली गिन्दनुक दॊह। हालस कडन हेरऺच़ पतॖ लुख व्वशफा केंच़न दोहन। हालकि त्योहार या व्वत्सव या बऺड्य दोह छि वऺर्ययिकिस वऺर्यस यिवान रोज़ान मगर असीय छॆनॖ फुर्सथ व्वंय यिम दॊह तमि अन्दाज़ॖ मनावनस सॊम्ब यॆमि अन्दाज़ॖ ॳस्य ॴस्य यिम बऺड्य दॊह कऺशीरि मंज़ अज़ पान्च़ॖत्रॖह च़तजिह वऺरी ब्रोंठ मनावान। ज़ानि दय यि फुर्सथ गऺयि कॊत। दरअसल छु इन्सान अज़कल सिरिफ़ पौंसस पतॖ दवान तॖ तऺथ्य दलदलस मंज़ फऺसिथ गऺयि तऺमिस स्व फुर्सथ अथॖ नीरिथ। सॗतीय थोव हालातव यि इन्सान तिथॖ पऻठ्य आवुर ज़ि सु गव वारॖ वारॖ पनॖन्यन निशि दूर गछ़ान तॖ गव मऺशरावान पनॖन्य परम्परा। गिन्दनॖक्य नावॖय यऻत्य रूद्य याद मगर तिमन नावन सॗत्य गिन्दुन रूद नॖ कुनीय। ********************** नऺविव तॖ फॊलिव भूषण कौल "दीप" (बूज़िव ॳज़्युक सबक़ म्यानि ज़्यॆवि ति) (यि सबक़ वुछिव podcast दऺस्य ति) https://anchor.fm/bldeep (यि सबक़ वुछिव koshursabak.bligspot.com प्यठॖ ति)