नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे -------------------

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे ---------------------------------- 🙏🙏 नमस्कार माहरा 08.03.2022, फागुन (फाल्गुन) ज़ूनॖ पछॖ (शुक्ल पक्ष) शॆयम (षष्ठी) बॊम्वार (मंगलवार) श्री सप्तर्षि सम्वत 5097, नक्षत्र कृति, राश वृष (दुहचि 12.30 बजि प्यठॖ), ऋतु शिशर (चलान)...अज़ छि कुमार शॆयम (कुमार षष्ठी) ति ********************** त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव ********************** महामऻरी नाश - मंत्र जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते ********************** बरादर आव पनॖन्य कऻम म्वकॖलऻविथ तॖ दॊपुन तीज़मालि वन बी व्वंय च़ॖ ब्रोंहकुन कथ। कथ क्याबा ज़न छसय बॖ रामायण बोज़नावान। तीज़मालि द्युतनस असान असान जवाब। मऻजी यॆमि अन्दाज़ॖ च़्यॆ यि कथ शॊरु कऺरॖथ तॖ वुन्यखताम रूज़ॖख बोज़नावान यिति बोज़नोवुथ च़्यॆ अख रामायणा। किथ सना पऻठ्य। तीज़मालि प्रुछ़ बरादरस। अथ कथि मंज़ क्याह बास्योय च़्यॆ रामायण ह्यु। तीज़मालि कॊर सवाल बरादरस। मऻजी यॊत ताम म्यॆ फिकिरी तॊर म्यॆ बास्यव ज़ि रामॖच़ऺन्दरॖन्य पऻठ्य ॴस्मॖत्य छि माधव जुवॖन्य शुर्य सऻरी फर्माबरदार। दॖरॖकाकॖन्यन हुन्द पानॖवॖन्य माय महोब्बतॖ। हशि हॆहरॖ सुन्द मान तॖ यज़थ न्वश्यव दऺस्य करान रोज़ुन, ब्यॆयि सुन्द शुर पनुन शुर ज़ऻनिथ तिमन लाड प्यार करुन तॖ स्यॊद सादॖ ज़िन्दगी जियिन्य यि छा रामायणॖ खॊतॖ कम। बरादरन वॊन तीज़मालि। अज़कल छु म्यॆ बासान ज़न सोरुय फिरिथॖय। बरादरन कऺर कथ पूरॖ। आहनबा च्योन वनुन छु पॊज़। तवय छि आमॖत्य माधव जुवनि गरिच मिसाल दिवान तमि मऺहलॖक्य लूख तॖ ब्यॆयि तिम युहुन्द माधव जुवुन गरॖ ओस्मुत ओस रूदमुत युन गछ़ुन। मऻजी बोज़नावी ब्रोंहकुन। कथ छि जऻरी ********************** कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव """"""""""""""""""""""""""""""""""" कऺशीर - बेसबरी तॖ बेतऻबी सान ॴस्य सऻन्य शुर्य क्यो बऺड्य प्रारान रोज़ान कर यी तीलॖ ॴठम। कांगरि ख्वर, फुट्यमॖत्य क्रॆंजॖल्य, फुचिमच़ॖ फ्वतरि तॖ ह्वख गासॖ ॴस्य सॊम्बरावान रोज़ान तिक्याज़ि तीलॖ ॴठम दॊह ॴस्य यिम सऻरी चीज़ नज़रे आतॖश यिवान करनॖ। डून्य बऻगरावनुक सिल्सिलॖ ओस चलान रोज़ान। म्यॆ छु पूरॖपऻठ्य याद ज़ि सरकऻर्य दफ्तरन मंज़ ॴस्य कऻशिर्य बटॖ मुलऻज़िम मुस्लमान मुलऻज़िमन डून्य बऻगरावान रोज़ान। म्यॆ बासान ज़ि डून्य बऻगरावॖन्य ओस अख बहानॖ बऺल्कि पान्यार बऺडरावुन तॖ माय महोब्बतॖ रऺछ़रावनुक अख मज़बूत ज़ऺरियि छु अम्युक ख़ास मक्सद रूदमुत। यिमन चीज़न हॖन्ज़ कऺमी छि ॳस्य व्वंय व्वंय मॊहसूस करान। यिम द्वयत्रॖह वऺरी द्रायि असि यि व्यछ़य पानस सॗत्य पकनावान। हालांकि असि छि अज़कल यातायातॖक्य सऻरी सादन मॊयसर मस्लन कारॖ, स्कूटर, रिक्शा वगैरा मगर अंग ॴश्यनाव, हक़ हमसायि, यार दोस्त छ़ान्डुन छु मुश्किल। कति अनोख तिम यार दोस्त तॖ कति लबोख तिम अंग ॴश्यनाव। ********************** नऺविव तॖ फॊलिव भूषण कौल "दीप" (बूज़िव ॳज़्युक सबक़ म्यानि ज़्यॆवि ति) (यि सबक़ वुछिव podcast दऺस्य ति) https://anchor.fm/bldeep (यि सबक़ वुछिव koshursabak.blogspot.com प्यठॖ ति)