نشيد عبطستان – جوني وأحمد شوقي

فاكر إني هـ أخاف م البطش لأ يا حبيبي ماتستعبطش كرباجك مش هـ يخوِّفنا دانتا يا عِرَّة تملِّي كاسفنا مِن ألاعيبك احنا قرفنا كدبك واسع ماتظبطش فاكر إني هـ أخاف م البطش حد يقول له مايستعبطش عامل إنه إله ورزقنا لو طرقع بصباعُه يبيدنا وحنا فـ صخر الحلم عزقنا شوفنا الدم ورود على إيدنا معقول يعني هـ يبقى جزاءنا إن سيادتك تستعبدنا هاأأأو هاأأأو قال بيقول بكرة هـ تحلَوْ هاأأأو هاأأأو إلعب غيرها يا سِم يا بَوْ قال دانا جِنّ دا حتَّى أرسطو كان بيجيلي مِحزِّم وسطُه سجني مريح علشان تنبسطوا فيه مراجيح ومعطِّر جَوْ هاأأأو هاأأأو فاكر إني هـ أخاف م البطش لأ يا حبيبي ماتستعبطش كتَّر خيرك ناهب خيرنا مِستموِت علشان تفقرنا صُب حنانك بقى على غيرنا عقلي مصحصح ماتلخبطش فاكر إني هـ أخاف م البطش حد يقول له مايستعبطش نافش ريشُه محمَّر عينُه مش مستحمل نبلع ريقنا ماحنا أساسًا مش طايقينُه حد يقول له يا حلو غِرقنا عقلك جَهبَذ مش فاهمينُه جَهبِذ ياللا بعيد وفارقنا هاأأأو هاأأأو قال بيقول بكرة هـ تحلَوْ هاأأأو هاأأأو أفعى وقاعدة بتتلولَوْ قال دي الحاشية بتترقَّصلي والتماثيل ماشية تبصبصلي حاسبوا عليَّا أتأثر أصلي دمعي بيملا حِلل فـ التوْ قال دي الحاشية بتترقَّصلُه والتماثيل ماشية تبصبصلُه حاسبوا عليه يتأثر أصلُه دمعُه بيملا حِلل فـ التوْ هاأأأو هاأأأو هاأأأأأأأو ............... كلمات وألحان ورؤية: أنطونيوس نبيل توزيع: وليد ميمني شارك في الغناء: ريم نسيم سارة معروف جيتار: مصطفى فتحي قانون: وليد حسن إيقاع: أحمد بدير هندسة صوت وماستر: ميشيل عبد الملك شكر خاص لعمنا: جمال عمر