O Campus Industrial de Ferrol celebra o 25 de marzo a V Xornada de Portas Abertas da UDC para Bacharelato e FP

O Campus Industrial de Ferrol e o Servizo de Estudantes da Universidade da Coruña (UDC) organizarán o mércores 25 de marzo a súa V Xornada de Portas Abertas presencial, dirixida a alumnado de Bacharelato e ciclos de Formación Profesional Superior. A quenda de mañá (09:30-13:45) estará destinada a colexios e institutos, mentres que a da tarde (16:00-20:00) será máis familiar. Os participantes poderán elixir entre tres itinerarios: Ciencias da Saúde, Ciencias Sociais e Xurídicas + Artes e Humanidades ou Enxeñaría, visitando facultades e escolas especializadas, como Enfermaría e Podoloxía, Humanidades e Documentación, EUDI e a Escola Politécnica de Enxeñaría de Ferrol. As prazas son limitadas e a inscrición debe realizarse antes do 16 de marzo enviando un correo ou chamando ao 881 01 3621.