O Sombreiro despídese ata setembro cun programa cheo de contido social, cultural e artístico!

Nesta data do 25 de xullo, Día do Apóstolo e da Patria galega, faremos balance do 2014 con María Díaz de "Médicos sen Fronteiras", convidamos ás gañadoras do VII Certame de Microrrelatos de Panxea e O Sombreiro de Merlin, Silvana Lameiro, Ruth Ríos, Maria Joao Matos e Maruxa Martínez; e escoitaremos a Carol Bret recitando ao noso poeta Manoel Antonio. Dende a sección "O Marcapáxinas", Manuela Arcos traeranos as mellores recomendacións lectoras, e xa de volta, Susana Vázquez falaranos de como pasan o seu tempo de ocio algúns insignes escritores. Despediremos este último programa da tempada coa agrupación musical "Xardín Desordenado", poñendo música aos versos de Mª do Carme Kruckenberg, "Tanto de tanto", peza incluida no seu último traballo musical "Aprendendo a ladrar", como broche final. Grazas, de parte da directora de O Sombreiro de Merlín, Alicia López, a todos e todas os profesionais, seguidores, compañeiros e amigos que nos acompañáchedes ao longo desta tempada. Tedes a nosa palabra de que volveremos con máis arte e máis cultura comprometida cunha realidade social, que grazas a Panxea, FEAFES Galicia e MSF, faisenos máis cercana, comprensibel e dá sentido e compromiso á nosa laboura coma comunicadores en liberdade en Radio Obradoiro. Feliz verán, Feliz día do Apóstolo e da Patria galega. Axiña voltamos, pasaremos lista e agardamos que esteades aí, ao outro lado, escoitándonos os sábados entre ás 12.00 e 13.00hs do mediodía!