O Xeoparque Cabo Ortegal presentó en FITUR a súa Guía da Paisaxe para descubrir o territorio de forma interactiva

O Xeoparque Cabo Ortegal participou a pasada semana en FITUR, o maior escaparate turístico internacional, para reivindicar a riqueza xeolóxica, cultural e paisaxística do territorio. No marco do programa da Rede de Geoparques Españoles UNESCO, presentouse a Guía da Paisaxe, un novo recurso que pon en valor a comarca a través de 28 puntos de interese e 9 rutas deseñadas para coñecer os enclaves máis singulares do xeoparque. O acto contou coa presenza do vicepresidente da Deputación da Coruña, Xosé Regueira; da delegada territorial da Xunta de Galicia en Ferrol, Martina Aneiros; así como do xerente e do presidente do Xeoparque Cabo Ortegal, José Miguel Alonso e Alberto Rey. Este proxecto enmárcase no Plan de Sostibilidade Turística en Destino (PSTD), financiado pola Deputación da Coruña. A Guía da Paisaxe propón unha “viaxe ao interior da Terra” mediante un percorrido interactivo accesible a través dun código QR, que permite ás persoas visitantes consultar mapas, rutas e puntos de interese, ou mesmo crear o seu propio roteiro. Inclúe diferentes categorías patrimoniais e incorpora panorámicas 360º de 26 espazos emblemáticos, ofrecendo unha experiencia inmersiva e innovadora. Segundo destacou José Miguel Alonso, a iniciativa reforza o posicionamento do xeoparque como referente do xeoturismo sostible no noroeste peninsular.