Obends ward dat düster...

What this episode covers

So, nu is de EU-Wohl je vörbi, un nu segg ick ook mol wat dorto. Noch hebbt wi je Meenungsfrieheit. Wo weer dat denn? Och jo: So veel Lüüd as selten sünd losloopen, üm ehr Krüüz op den Zettel to moken, de je meist so groot weer as ’n Wulldeek. Un wat op de 90 Zentimeter Poppier allns opstunn.  Vun de mehrsten Partei’n heff ick noch nie wat heuert. De hebbt wohrschienli keen Reklame mokt. Overs wo wi al bi de Wohlreklame sünd: Harr ick mi dör de Wohlreklame in Rundfunk un so wieder för een Partei entscheeden schullt, denn harr ick vörigen Sünndag wohrschienli narms mien Krüüz mokt. Wenn man sick nömli ankiekt, wat de eenzelnen Partei’n verännern wüllt, denn wüllt se ünnern Streek meist all datsülbige. Dor harrn sick denn je ook de mehrsten Partei’n tosomslüüten kunnt üm blots een Reklame för all to moken. Dat weer ook recht wat günstiger ween.  Un düsse Reklame harr denn so utsehn: „Wi sünd de Partein, de in’t EU-Parlament wüllt. Un wi stoht all tosom dorför, dat de Himmel blau is, dat Woter natt is, dat dat obends düster ward (tominst buten) un dat Hunn’schiet stinken deiht. Mokt Se also ehr Krüüz bi een vun uns. Dor künnt se nix verkehrt moken.“  De restlichen Partei’n, also de ganz rechs un ganz links, de harrn sick denn ook tosomslüten kunnt. De ehr Reklame wurr denn so utsehn: „Dat wat de Annern wüllt, dat wüllt wi ni. Overs ook wi weet sülms noch ni so genau, wat wi wüllt, dat överleggt wi uns bilütten, wenn Se ehr Krüüz bi uns mokt. Würkli!“ Un nu jault de SPD un de CDU mitmol rüm, dat se blots noch so weni Stimm‘ kriegt. Tscha. Vun nix kümmt nix, wurr ick seggen. Un dat veele vun de jungen Lüüd de Greun‘ wählt, dat weer doch klor. Ju mööt ook mol ’n beten toheuern, Ju Dussels. Överall, op de Strooten, in’t Internet un sünstwo ward dat vertellt. Overs de „Volkspartei’n“ doht so, as harrn se dat ni mitkreegen. Un wenn se dat doch mitkreegen hebbt, denn hebbt se seggt: „Dat is allns Blödsinn!“ Hmm. Ick glööv bi de näste Wohl mok ick de Reklame. So slecht as de kann ick dat al lang... In düssen Sinn

PodParley-generated summary based on available episode metadata and transcript content.