Opaí Teatro celebra dous premios Manuel Lourenzo e reivindica o teatro en galego coa obra ‘De marzo a marzo"

O colectivo Opaí Teatro, de Canido, celebra os dous galardóns acadados na primeira edición dos premios Manuel Lourenzo do teatro afeccionado, organizados por Feteagal. O actor Fran Muiño, distinguido como mellor intérprete de reparto, destacou en RadioVoz Ferrol que os premios son froito do traballo de todo o elenco. O recoñecemento chegou pola obra De marzo a marzo, unha peza que reivindica a loita obreira e o movemento sindical vinculado á antiga Bazán e que tivo unha gran acollida en Ferrolterra e no resto de Galicia. A montaxe sumou catro candidaturas e dous premios, entre eles o de Alexis Sequeiro como mellor actor protagonista. O grupo, que reúne máis de trinta persoas, continúa de xira con diferentes propostas e prepara unha nova etapa baixo a dirección de Isabel Risco, tras a marcha temporal de Cristina Mariño. Muiño reivindicou tamén o compromiso de Opaí Teatro coa lingua galega, malia as dificultades para levar as súas obras fóra de Galicia.