Programa1411

Edición número 1411 de O Recanto do Corcovado. Puidestes escoitala o venres 7 de xuño a través de RKV Radio Vigo, e o sábado 8 de xuño na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 12 de xuño a través de Radio Crónica Folk Musical. Arrancamos o programa en clave lusófona co último EP de Tagua Tagua, alterego artístico do músico de São Paulo Felipe Puperi. A seguir, estéovos o primeiro sinxelo extraído de “Ela partiu”, o primeiro traballo de Laíz. Laíz é natural de Jundiaí, mais reside en Alemaña dende hai algúns anos. Coa colaboración da banda The New Love Experience ofrécenos unha fusión inqueda entre hip hop, groove, trap, afrobeat e tropicalismo. O disco será editado por Agogo Records en setembro. Completamos o primeiro bloque do programa dende Portugal con “Maré”, proxecto multidicisplinar que homenaxea o traballo da xente do mar. Na segunda parte do programa escoitamos os novos dicos de Liraz e The Zawose Queens, ademais de familiarizarnos con diferentes sinxelos, todos eles adiantos de discos que serán publicados nas vindeiras semanas. É o caso das novas cancións da banda colombiana Meridian Brothers, quen seguen ben asentados na fusión entre pop, psicodelia e highlife. O seu novo disco, “Mi Latinoamérica sufre”, será oficialmente editado o vindeiro 12 de xullo. Completamos o programa con “Zero”, o novo disco de Forest Law, e con “Gran’s House”, EP producido polo DJ de Bristol Jay Singh para X, subselo de Real Worlds Records.