Programa1416

Edición número 1416 de O Recanto do Corcovado. Puidestes escoitala o venres 13 de setembro a través de RKV Radio Vigo, e o sábado 14 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 18 de setembro a través de Radio Crónica Folk Musical e o sábado 21 na sintonía de Rádio Filispim. O programa desta semana chega cargado de jazz contemporáneo. Abrímolo coa última producción do pianista noruegués Helge Lien, novamente en formato trío. Gravouno con Johannes Eick ao contrabaixo e Knut Aalefjær á batería, e a colaboración puntual de Tore Brunborg ao saxo. O seu novo disco, moi convincente, leva por título “Funeral Dance”. Editouno Ozella Musica a finais do pasado ano. Entramos a seguir na filosofía musical do selo WeJazz para escoitarmos as súas últimas producións. Algunhas delas aínda non foron editadas, así que só podo presentarvos algúns adiantos. É o caso dos novos traballos de Peter Evans e do dúo Lampen. Si están na rúa as novas gravacións do saxofonista Pauli Lyytinen e do supergrupo Superposition. Completaremos o programa co segundo disco do cuarteto de música contemporánea e jazz de vangarda Ainon, aproveitando que foi oficialmente publicado o 13 de setembro.