Programa1426

Edición número 1426 de O Recanto do Corcovado. Puidestes escoitala o venres 22 de novembro a través de RKV Radio Vigo, e o sábado 23 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 27 a través de Radio Crónica Folk Musical e o sábado 30 na sintonía de Rádio Filispim. Tecer relacións de calidade coa nosa familia é fundamental, mais tamén é vital facelo coas persoas da nosa contorna social e humana. Sobre esta idea constrúe Catuxa Salom os temas incluídos dentro de “Cāldo”, o seu primeiro disco. Logo de avanzar diferentes sinxelos deste disco, chega por fin a súa data oficial de publicación: tédelo nas tendas e nas plataformas dixitais dende esta mesma fin de semana. Aproveitando esta circunstancia, escollémolo como o noso disco destacado da semana. Escoitamos, ademais, o primeiro disco dos Mocho Gris, na rúa dende hai unha semana, así como os últimos sinxelos das Tanxugueiras coas Fillas de Cassandra e do colectivo Resaca Emocional. Entran tamén pezas de Su Garrido Pombo e Caamaño & Ameixeiras como introdución a unha nova entrega do Culturgal. Na parte final do programa seguimos a descubrir o último disco do Narci Rodríguez dA Trío.