Programa1459

Edición número 1459 de O Recanto do Corcovado. Puidestes escoitala o venres 12 de setembro a través de RKV Radio Vigo, e o sábado 13 na sintonía de Cuac FM A Coruña, Rádio Filispim e da Radio Municipal de Redondela. Pechamos a rolda de emisións o mércores 17 de setembro a través de Radio Crónica Folk Musical. No programa desta semana centramos a nosa atención en discos pertencentes ao espazo do jazz contemporáneo. Escollemos “Fusión olívica”, o novo traballo como líder de Rubén Reinaldo, como disco destacado da semana. Preséntovos, ademais, dous temas do novo proxecto da saxofonista sueca Linda Langendorf. Chega de novo aos mandos do seu grupo, os Langendorf United, quen en “Undercover Beast” renden tributo ao ethiojazz. Terédelo nas tendas o 26 de setembro. Outro disco que será editado proximamente, desta volta o 7 de novembro a través de WeJazz, é o novo traballo de Jonah Parzen-Johnson e Lau Nau. O disco é espléndido, e temos a sorte de poder compartir convosco un primeiro sinxelo. Na recta final escoitamos o proxecto “Silentropia”, onde traballan destacados valores do jazz finlandés actual: Jarmo Saari (guitarra), Pauli Lyytynen (saxo), Anni Elif (cello) e Paavo Malmberg (deseño sonoro). Completamos o programa con “Multipopar”, o último disco de Noa Lur.