Programa1474

Edición número 1474 de O Recanto do Corcovado. Puidestes escoitala o xoves 24 de decembro a través de Rádio Filispim, o venres 25 a través de RKV Radio Vigo e o sábado 27 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 31 a través de Radio Crónica Folk Musical. Esta semana, no derradeiro programa do ano 2025, escoitamos músicas editadas ao longo dos últimos meses. Parte destas músicas non entraron previamente por axustes de calendario. Outras adiantan discos que serán publicados no primeiro semestre do 2026. Abrimos o programa con “Al alba”, disco de natureza introspectiva asinado por Matthieu Saglio e Camille Saglio. Conectámolo co primeiro adianto extraído de “San Paolo di Galatina”, proxecto onde Raül Refree e Maria Mazzotta exploran as posibilidades estéticas das músicas litúrxicas italianas. Non é este o único sinxelo que vou presentarvos. Entran a seguir dous espléndidos temas. O primeiro, “Nobles y sentimentales”, primeiro adianto do novo disco de Marco Mezquida. O segundo, “Nortada”, peza asinada polo portugués Luis Peixoto. Na segunda parte do programa estréovos os últimos traballos da artista húngara Veronika Varga e do violinista chipriota Michalis Kouloumis. Varga, á voz e ao contrabaixo, traballa cunha visión fonda e creativa o legado das músicas tradicionais do seu país natal e de Grecia. Kouloumis, en “Displaced Dreams”, reflexiona sobre o drama das emigracións forzosas a través do Mediterráneo.