Risikogruppen an jede Eck

Risikogruppen an jede Eck   Veele Lüüd sünd düsse Doog je alleent, ne. Se sünd alleent, weil se to ’n Risikogrupp‘ heuert. Dat mutt man sick mol vörstelln: Dor heuert man to Gruppe un liekers is keeneen to’n Snacken dor - ’n feine Grupp‘ is mi dat. Overs ni blots wat den dorsten Virus anheiht – ick segg den Noom nu mol ni, den heuert man je oft genog – hebbt wi Risikogruppen bi uns in’t Land. To de gröttse Risikogrupp, de al siet Johrn dör de Gegend geistert, heuert de, de jümmers op den Apparot kieken doht, den se in de Hand hebbt, op ehr Smartfoon. Wenn se dor eenfach blots so mit op’n Börgerstieg löppt, denn geiht dat je noch. Dat gifft overs ook wülk, de fohrt op‘t Rad meern op de Stroot un kiekt op ehr’n Ackersnacker. Mennige stoht dorbi sogor op so’n elektrisched Rullbrett. Dat is twor ’n zirkusriepe Leistung overs verstohn kann ick dat ni. Wenn man so’n Akrobat nömli mit‘ Auto breedmangelt, denn kann man seeker ween, dat man ook de Schuld dorför kriegt. De mööt gor ni krank ween, üm sick den Mors to breeken oder sick dat Licht ut to knipsen. Op de anner Sied: So ganz gesund kümmt mi de Dorsten ook ni vör. Na jo. Annerlei. Dat is jedenfalls ook ’n Risikogrupp. Un wenn man in de Oarntied op’t Dörp wohnt, so as ick, denn heuert man automatisch to’n anner Risikogrupp. Wenn dor nömli de gewaltigen Treckers üm de Eck prescht kümmt, op de de oftmols jungen Fohrers ook gern op ehrn Ackersnacker kiekt, denn kann een gau mol dat Hart stohnblieven. So kann man ook in verscheedne Risikogruppen togliek ween. Wenn man to’n Bispill över 80 is, in de Oarn gern op sien Händie kiekt, dorbi op’n elektrisched Rullbrett op de Stroot fohrt, Asthma hett overs liekers noch gern smökt, Beer drinkt, sick to fett ernährt un sick bi osten Wind keen Mütz opsett, denn kriegt man wohrschienli de goldene Klubkoart bi’n Bestatter. Un so heuert man – ook wenn man sick alleent föhlt – jümmers irgendwo to, sülms wenn dat blots ’n Risikogrupp is. Overs de Hauptsook is, man blifft gesund...   In düssen Sinn