Spielanalyse SG vs GCZ: Hörnli x Sächsfoif - Elfmeter-Drama und Unterzahl – GC Züri verlürt ide Ostschwiiz | Sächsfoif #168

Mit eusne St. Galler Kollege vom FCSG Fan-Podcast hämmer die Episode ade Zürcher Langstrass ufgnoh. Mir reded über d Traditione vo de beide Clubs, wie d Podcasts entstande sind und über s komplette Duell vom FC St. Galle gege GC Züri. Podcast-Ablauf Hörnli x Sächsfoif: -Churzinterview direkt nachem Spiel usem Extrazug -Begrüessig & Vorstellig -Persönlichi Fan-Gschichte, sportlichi Situation und Podcast-Entstehig -Spielanalyse: SG vs. GCZ -Blick ih d Zuekunft die Saison -Abschluss & Verabschiedig D Grasshoppers Züri bliebed ih de Ostschwiiz ohni Zählbares. Trotz enere engagierte Leistig münnd sich d Stadtzürcher em FC St. Galle mit 1:3 gschlage geh. D Zürcher sind zerst die aktiveri Mannschaft gsi, sind denn aber mit em erste St. Galler Goalschuss in Rückstand cho. Churz druff abe isch de nöchst Rückschlag cho: Captain Abrashi gseht ide 22. Minute rot. Trotzdem hätt de Rekordmeister GC Züri witerkämpft und ih de 32. Minute per Kittel-Elfmeter usgliche. Nach de Pause ischs en wiitere Strafstoss gsi wo d St. Galler wieder beflüglet hätt, bevor de Witzig miteme Traumgoal de Endstand besieglet hätt. Eusi Nummere 1 de Justin Hammel hätt schlimmers chönne verhindere, doch de ersti Stadtclub vo Züri isch in Unterzahl chancenlos bliebe. Nögst Wuche folgt s Spiel gege de FC Sion im Letzi, darum alli is Stadion! #GCIschZüri