【台語民間故事】紅孩兒︱Âng-hâi-jî｜白話字(pe̍h-ōe-jī)字幕

【民間故事】紅孩兒︱Âng-hâi-jî 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 內文摘錄： 唐三藏in師徒4 ê人，一直ùi西pêng行，beh去取經。Chit 1日，行到1片樹林。看tio̍h 2粒山相連ê中央nah--落-去ê所在，天頂浮1 lúi雲，雲ê色水是紅色--ê。原來hia to̍h是「火雲洞」，有1 ê叫「紅孩兒」ê妖怪tòa tī內底。聽人講食唐三藏ê肉ē-sái長生不老。Chit ê紅孩兒to̍h有hit-lō心思，想欲來掠唐三藏食伊ê肉。 Tông Sam-chōng in su-tô͘ 4 ê lâng, it-ti̍t ùi sai-pêng kiâⁿ, beh khì chhú-keng. Chit 1 ji̍t, kiâⁿ-kàu 1 phiàn chhiū-nâ. Khòaⁿ-tio̍h 2 lia̍p soaⁿ sio-liân ê tiong-ng nah--lo̍h-khì ê só͘-chāi, thiⁿ-téng phû 1 lúi hûn, hûn ê sek-chúi sī âng-sek--ê. Goân-lâi hia to̍h sī “Hóe-hûn-tōng”, ū 1 ê kiò “Âng-hâi-jî” ê iau-koài tòa tī lāi-té. Thiaⁿ-lâng kóng chia̍h Tông Sam-chōng ê bah ē-sái tiông-seng put-nó͘. Chit ê Âng-hâi-jî to̍h ū hit-lō sim-su, siūⁿ-beh lâi lia̍h Tông Sam-chōng chia̍h i ê bah. 紅孩兒kā時機lia̍h ho͘ chún，tī唐三藏in師徒ē經過ê路--ni̍h，kā家己變做1 ê kó͘-chui ê細漢gín-á，hông縛tī樹á頂。看tio̍h唐三藏in ná行ná倚家己chia，紅孩兒刁工假háu，假做chiok驚惶ê款，大大聲hoah講：「師父，救命！師父，救命！」唐三藏聽--tio̍h，to̍h趕緊叫豬八戒kā紅孩兒救--loài。Koh叫孫悟空ka āiⁿ kui路--ê！ Âng-hâi-jî kā sî-ki lia̍h ho͘ chún, tī Tông Sam-chōng in su-tô͘ ē keng-kòe ê lō͘--ni̍h, kā ka-tī piàn-chò 1 ê kó͘-chui ê sè-hàn gín-á, hông pa̍k tī chhiū-á-téng. Khòaⁿ-tio̍h Tông Sam-chōng in ná kiâⁿ ná óa ka-tī chia, Âng-hâi-jî tiau-kang ké háu, ké-chò chiok kiaⁿ-hiâⁿ ê khoán. Tōa-tōa siaⁿ hoah kóng: “Su-hū, kiù-miā! Su-hū, kiù-miā!”. Tông Sam-chōng thiaⁿ--tio̍h, to̍h kóaⁿ-kín kiò Ti Pat-kài kā Âng-hâi-jî kiù--loài. Koh kiò Sun Gō͘-khong ka āiⁿ kui-lō͘--ê! 窮實孫悟空早to̍h看出來紅孩兒是1 ê妖怪。不而過，iah未赴出手，to̍h先去中tio̍h紅孩兒ê詭計--ah！紅孩兒作法變1 ê chiok重ê假人，khǹg tī孫悟空ê kha-chiah-phiaⁿ，kā伊teh kah倒tī土腳，bē振bē動，hâm beh khiā to khiā bē--起-來。趁chit ê時陣紅孩兒hoah 1 chūn風來，kā唐三藏捲入去火雲洞。 Khêng-si̍t Sun Gō͘-khong chá to̍h khòaⁿ chhut-lâi Âng-hâi-jî sī 1 ê iau-koài. Put-jî-kò, iah bōe-hù chhut-chhiú, to̍h seng-khì tiòng tio̍h Âng-hâi-jî ê kúi-kè--ah! Âng-hâi-jî chok-hoat piàn 1 ê chiok tāng ê ké-lâng, khǹg tī Sun Gō͘-khong ê kha-chiah-phiaⁿ, kā i teh kah tó tī thô͘-kha, bē-tín-bē-tāng, hâm beh khiā to khiā bē--khí-lâi. Thàn chit ê sî-chūn Âng-hâi-jî hoah 1 chūn hong lâi, kā Tông Sam-chōng kńg ji̍p-khì Hóe-hûn-tōng. 過1時á，孫悟空chiâⁿ無簡單chiah ùi假人下腳爬--出-來，to̍h趕緊kā山神叫來問。山神講：「Hit ê小妖怪是牛魔王in後生，tòa tī火雲洞，chiok狡怪--ê！靠勢家己功夫好，四界kâng phah、欺負--人。」這時，孫悟空chiah知影hit ê小妖怪ê身份，是家己過去結拜兄弟牛魔王ê後生。Án-ne算--起-來mā是家己ê孫á。 Kòe 1-sî-á, Sun Gō͘-khong chiâⁿ bô kán-tan chiah ùi ké-lâng ē-kha pê--chhut-lâi, to̍h kóaⁿ-kín kā soaⁿ-sîn kiò lâi mn̄g. Soaⁿ-sîn kóng：”Hit ê sió iau-koài sī Gû-mô͘-ông in hāu-seⁿ, tòa tī Hóe-hûn-tōng, chiok káu-koài--ê! Khò-sè ka-tī kang-hu hó, sì-kè kâng phah, khi-hū--lâng.” Chit-sî, Sun Gō͘-khong chiah chai-iáⁿ hit ê sió iau-koài ê sin-hūn, sī ka-tī kòe-khì kiat-pài hiaⁿ-tī Gû-mô͘-ông ê hāu-seⁿ. Án-ne sǹg--khí-lâi mā sī ka-tī ê sun-á. 伊to̍h kā豬八戒kah沙悟淨講: 「Lín tòa chia kā行李顧ho͘好勢，我來去救師父。」講soah孫悟空to̍h家己1 ê人飛去紅孩兒ê火雲洞。 I to̍h kā Ti Pat-kài kah Soa Gō͘-chēng kóng: “Lín tòa chia kā hêng-lí kò͘ ho͘ hó-sè, góa lâi-khì kiù su-hū.” Kóng soah Sun Gō͘-khong to̍h ka-tī 1 ê lâng poe khì Âng-hâi-jî ê Hóe-hûn-tōng. 孫悟空來到火雲洞外口，大聲hoah講：「紅孩兒，我是lín老爸牛魔王ê結拜兄弟，緊kā goán師父放--chhoài。」過1下á，火雲洞ê洞門開--開。紅孩兒穿1領紅kì-kì ê風幔，手gia̍h 1支丈八hia長ê火尖槍。Ùi洞內行--出-來，範頭kài威風，後piah koh有幾ê小妖怪tòe--leh。孫悟空看--tio̍h，嘴gī--leh gī--leh，笑笑á講：「乖孫á，chiâⁿ乖，chiâⁿ聽話。」 Sun Gō͘-khong lâi-kàu Hóe-hûn-tōng gōa-kháu, tōa-siaⁿ hoah kóng: “Âng-hâi-jî, góa sī lín lāu-pē Gû-mô͘-ông ê kiat-pài hiaⁿ-tī, kín kā goán su-hū pàng--chhoài.” Kòe 1-ē-á, Hóe-hûn-tōng ê tōng-mn̂g khui--khui. Âng-hâi-jî chhēng 1 niá âng-kì-kì ê hong-moa, chhiú gia̍h 1 ki tn̄g-pat hia tn̂g ê Hóe-chiam-chhiuⁿ. Ùi tōng lāi kiâⁿ--chhut-lâi, pān-thâu kài ui-hong, āu-piah koh ū kúi ê sió iau-koài tòe--leh. Sun Gō͘-khong khòaⁿ--tio̍h, chhùi gī--leh gī--leh, chhiò-chhiò-á kóng: “Koai sun-á, chiâⁿ koai, chiâⁿ thiaⁿ-ōe.” 紅孩兒kā火尖槍插tī土腳，手插腰講：「Siáng是你ê孫á？」Sûi講soah，伊to̍h ùi嘴phùn1 pha三昧真火--出來。 Âng-hâi-jî kā Hóe-chiam-chhiuⁿ chhah tī thô͘-kha, chhiú chhah io kóng: “Siáng sī lí ê sun-á?” Sûi kóng soah, i to̍h ùi chhùi phùn 1 pha Sam-māi-chin-hóe--chhut-lâi. -- Hosting provided by SoundOn