तुलु(मायाचेवर) - "जीवन के शब्द".mp4

Tulu(Myacherver) - "Words of Life".mp4 // 1 ಕೊರಿಂಥ್ಯೆರೆಗ್ 13 - ಪ್ರೀತಿ ಮಾತೆಟ್ಟ್ ಮಲ್ಲವು1ಯಾನ್ ನರಮಾನಿಲೆ ಭಾಷೆಲೆನ್ಲಾ ದೂತೆರೆ ಭಾಷೆಲೆನ್ಲಾ ಪಾತೆರಿಯೆಡ ಎನಡ ಪ್ರೀತಿ ಇಜ್ಜಾಂಡ ಯಾನ್ ಶಬ್ಧ ಮಲ್ಪುನ ಕಂಚಿಲಾ ಗಣಗಣ ಆಪಿನ ತಾಳಲಾ ಮಾತ್ರ ಆದುಲ್ಲೆ. 2ಎಂಕ್ ಪ್ರವಾದನೆದ ವರ ಇತ್ತ್ಂಡಲಾ ಮಾತ ಗೇನ ಇತ್ತ್ಂಡಲಾ ಮಾತ ಮರ್ಮೊಲೆನ್ ತೆರಿದಿತ್ತ್ಂಡಲಾ ಪರ್ವತೊಲೆನ್ ಲಕ್ಕಾವುನಾತ್ ಮಲ್ಲ ನಂಬಿಕೆ ಇತ್ತ್ಂಡಲಾ ಎನಡ ಪ್ರೀತಿ ಇಜ್ಜಾಂಡ ದಾಲಾ ಇಜ್ಜಾಂದಿನಾಯೆ ಆದುಲ್ಲೆ. 3ಎಂಕುಪ್ಪು ಮಾತ ಬದ್‌ಕ್‌ನ್ ಧರ್ಮಾದ್ ಕೊರಿಯೆರ್ಡಲಾ ಎನ ಶರೀರೊನು ಪೊತ್ತಾವೆರೆ ಒಚ್ಚಿದ್ ಕೊರಿಯೆಡಲಾ ಎನಡ ಪ್ರೀತಿ ಇಜ್ಜಾಂಡ ಎಂಕ್ ದಾಲಾ ಪ್ರಯೋಜನ ಇಜ್ಜಿ. 4ಪ್ರೀತಿ ತಾಳೊನುಂಡು; ಪ್ರೀತಿ ದಯದಾಕ್ಷಿಣ ತೋಜಾವುಂಡು; ಪ್ರೀತಿ ಮಚ್ಚರ ಪಡೆವುಜಿ; ಬೂಟು ಮಲ್ಪುಜಿ; ಉಬ್ಬೆರೊನುಜಿ; 5ಪ್ರೀತಿ ಮರ್ಯಾದಿ ತೆಟ್ಟ್‌ದ್ ನಡಪುಜಿ, ತನನೇ ನಾಡುಜಿ; ಕೋಪ ಮಲ್ತೊನುಜಿ, ತಪ್ಪುಮಲ್ತಿನೆನ್ ಮದಪುಂಡು. 6ಅನ್ಯಾಯೊನು ತೂದು ಸಂತೋಷ ಮಲ್ಪಂದೆ, ಸತ್ಯೊಗು ಜಯ ಆಪಿನೆನ್ ತೂದು ಸಂತೋಷ ಮಲ್ಪುಂಡು; 7ಪ್ರೀತಿ ಮಾತೆನ್ಲಾ ಮನಸ್‌ಡೇ ಸಹಿಸೊಂಡು, ಮಾತೆನ್ಲಾ ನಂಬುಂಡು, ಮಾತೆನ್ಲಾ ಭರವಸೆ ಮಲ್ಪುಂಡು, ಮಾತೆನ್ಲಾ ತಡೆತೊನುಂಡು. 8ಪ್ರೀತಿ ಏಪಲಾ ಬೂರ್ದು ಪೋಪುಜಿ, ಪ್ರವಾದನೆಲಾಂಡಲಾ ಉಂತುದು ಪೋವು; ಬೇತೆ ಬೇತೆ ಭಾಷೆಲು ಮುಗಿಯು, ಗೇನಲಾ ಆಳಿದ್ ಪೋವು. 9ನಮ ಒಂತೊಂತೆನೇ ತೆರಿಯೊನ್ವ; ಒಂತೊಂತೆನೇ ಪ್ರವಾದನೆ ಮಲ್ಪುವ. 10ಆಂಡ ಪರಿಪೂರ್ಣವಾಯಿನವು ಬರ್ಪಿನಪಗ ಒಂತೊಂತೆ ಇತ್ತಿನವು ಇಜ್ಜಾಂದೆ ಪೋವು.11ಯಾನ್ ಬಾಲೆ ಆದುಪ್ಪುನಗ ಬಾಲೆದ ಲೆಕ್ಕನೇ ಪಾತೆರಿಯೆ. ಬಾಲೆದ ಲೆಕ್ಕನೇ ಎನ್ನಿಯೆ, ಬಾಲೆದ ಲೆಕ್ಕನೇ ಆಲೋಚನೆ ಮಲ್ತೆ. ಪ್ರಾಯೊಗು ಬನ್ನಗ ಬಾಲೆದೆನ್ ಬುಡ್ದು ಬುಡಿಯೆ. 12ಇತ್ತೆ ನಮ (ದೇವೆರೆ ಮೋನೆನ್) ಕನ್ನಡಿಡ್ ತೋಜುಲೆಕ್ಕನೆ ತೂಪ; ಆಂಡ ಬೊಕ್ಕ ಎದುರೆದುರು ತೂವ. ಇತ್ತೆ ಎಂಕ್ ಒಂತೊಂತೆನೆ ತೆರಿದುಂಡು; ಆಂಡ ಅಪಗ ದೇವೆರ್ ಎನನ್ ತೆರಿಯೊನುಲೆಕ್ಕ ಯಾನ್ಲಾ ಪೂರ್ತಿ ಆದ್ ತೆರಿಯೊನ್ವೆ. 13ಇತ್ತೆ ನಂಬಿಕೆ, ಭರವಸ, ಬೊಕ್ಕ ಪ್ರೀತಿ, ಉಂದು ಮೂಜಿ ಮಾತ್ರ ಒರಿಯುಂಡು. ಆಂಡ ಐಟ್ಟ್ ಮಾತೆಟ್ಟ್ ಮಲ್ಲವು ಪ್ರೀತಿಯೇ.