Wat schall man warrn?

Kinnt Jüm dat noch: Wenn man lütt is, denn frogt de Grooten je gern: „Na, wat wullt du denn loter mol warrn?“ Jo, ick geev dat to: Ook ick heff Kinner düsse Froog bilütten al mol stellt. Un de hebbt mi denn jüst so dösig ankeeken, as ick keeken heff, as ick noch ’n lütten Stackel weer. Irgendwann heff ick denn overs anfungen, mi ’n Antwoord op düsse leidige Froog to överleggen. Veele vun mien Kumpels wulln Astronaut warrn oder Lokomotivföhrer. Astronaut, jo, dat hett sick spannend anheuert. Mit’n Raket‘ no Mond henfleegen oder so, dat weer al wat. Overs wat schall man as Astronaut moken, wenn man jüst ni op’n Mond is? Un överhaupt: Wat gifft dat op den Mond denn grootoarti to holn? Blots Sand un Steen. As op’n riesiege Buusteed, blots dat dor nix buut ward. Nä. Astronaut is doch ni so dat Geele vun’t Ei. Un Lokomotivföhrer, dat heff ick mi jümmers al bannig langwieli vörstellt. Dor kann man ni mol no Stüüerbord oder Backbord afbeugen, wenn dor wat Interessanted to sehn is. Blots Gas geeven un Bremsen un sick vun de Fohrgäst anheuern, dat man al weller to loot an Bohnhoff is. Nä. Dat weer ook nix. Dor funn ick dat, wat mien Vadder dohn hett doch al veel scheuner. De is blangbi nömli oftmols Reisebus fohrt. Un ick heff mitfohrn dörfst. Dor keem man jümmers ümsünst dorhen, wonehm anner lüüd för veel Geld in Urlaub fohrt sünd. Ick heff vöör op den Sitz för’t Begleitpersonol sitten dörfst un kunn mi ut dat Köhlschapp, dat dor ook weer af un to ’n Bruus nehm. Jo. Dat weer ni slecht. Also heff ick seggt, wenn de Grooten mol weller frogen dehn: „Ick warr Reisebusfohrer, un wenn du in Urlaub wullt, muttst du mi dorför betohln.“ Jo, so weer dat. Overs eegentli finn ick dat würkli schodt, dat ick jüst nu kenn Kind ween kann. Wurr mi nömli hüüt as lütten lütten Jung een frogen, wat ick mol warrn wull, denn keem dat as ut de Pistol schooten: „Ick warr Fabrikant för Schiethuuspoppier, is doch klor!“ Un jedet mol, wenn de Dorsten op Tante Meier leepen, wurrn se an mi dinken...   In düssen Sinn