Wat vun nix kümmt

Frank Schätzing is splitteri. Sien Book „Der Schwarm“ is verfilmt worrn. Na jo, so’n beten tominst. Dat Book heff ick leest. Un de achtdeelige Reeg in de ZDF-Mediathek heff ick ook al bet to Enn sehn. Tscha, ick mutt seggen, wat ick Schätzing verstohn kann. He hett seggt, dat wat ut sien Geschicht morkt worrn is, hett mehr vun Rosamunde Pilcher as vun sien Book. Dor hett he recht. Överhaupt stimmt blots dree, veer Sooken mit dat övereen, wat in’t Book steiht. Ick heff bi’t Fernseh kieken bet to’n Sluss dorop töövt, wat dat ennli losgeiht. Op de anner Sied: Schätzing wull sülms veel verännern: He wull de Geschicht in de Tokunft speeln loten. Dor schulln ook de „Fridays for Future“-Demos in vörkom un so. He wull dor wat politisched ut moken. So no dat Motto: „Heuert op mi un Greta Thunberg oder ju kümmt all in de Höll‘ to’n Schiet schippen.“ Ick weet ni so recht, wat mi dat beter gefulln harr – also de Idee, ni dat Schiet schippen. Ick harr eenfach gern sehn, wat in’t Book steiht, sowiet man even duusend Sieden op acht Stünnen tosomdampen kann. Oha, un denn weer in de ZDF-Ümsettung je ook noch de U-Boot-Kaptein, de vun den Spoßvogel Klaas Heufer-Umlauf speelt wurr. Jungedi, wat’n schauspeelerische Leistung! Dor ward een Angst un Bang‘ vun. Ick heff mi de ganze Tied wünscht, dat sien Kolleg‘ Joko Winterscheidt den Kopp in’t U-Boot steekt un seggt: „Kom‘ Klaas, lot dat no mit dat Schauspeelern. Dat U-Boot kann ook vun anner Lüüd fohrt warrn.“ Wat mi overs würkli splitteri an de ganze Angelegenheit mokt, dat is, wat dat ZDF dor 40 Million‘ för verplempert hett. Vun dat GEZ-Geld. Vun uns‘ Geld. Wenn ’n Privotminsch so veel Euros vör so’n Krom ruthaut is dat sien Sook. Overs so mit dat Geld ümtogohn, dat een anner Lüüd anvertruut hebbt, dat heuert sick ni, much ick meenen. Dor kümmt je ni mol an de Kino-Kass wat vun Trüch. De Million‘ sünd eenfach wech. Un in‘ halved Johr ward weller de Rundfunkgebührn anhoven. Tscha, vun nix kümmt nix. Overs nix weer mi in düssen Fall würkli leever ween… In düssen Sinn