Weller Dinosauriers warrn

Weller Dinosauriers warrn Op jeden Fall ännert sick dat Klima, dat kann ook de düllste Aluhoot-Dreeger ni mehr afstrieden. Wenn ick wat to seggen harr, wurr ick dat dor overs ni op ankom‘ loten un ’n Proppen in‘ Utpuff vun de Minschheit drücken, ’n Versöök weer dat wert. Nu gifft dat je weller ’n niede Idee: All, de ’n eegen’d Huus mit ’n eegene Solaranlog op’t Dack hebbt un bi de ’n E-Auto in de Garosch steiht oder bald stohn schall – all de schüllt bald bet to 10200 Euro Förderung kriegen. So as ’n lütted Dankescheun vun de Regeerung, kann man seggen. Dat heuert sick je erstmol so an, as wenn mol weller blots de, de so un so all ’n ganzen Barg hebbt, noch mehr kriegen schüllt. Dat is an un för sick ook so. Danke, leeve Ampel in Berlin. Overs Oogenblick mol: Wenn man in Hamborg, Frankfurt oder Köln ’n Eegentumswohnung för ’n halve Millioon oder mehr hett, denn haut dat ook ni hen. Dor hett man je keen eegen’d Dack. Heuchstens ’n poor Quadrotmeter vun’t gemeensome Dack. Dat heet, all, de sick so un so keen eegen’d Huus mit ’n eegene Solaranlog leisten künnt, un ’n eegen’d E-Auto al gor ni, de hebbt natüürli nix vun düsse Idee. Overs ook all de, de dat twor to Reichtum bröcht hebbt, overs even „blots“ ’n eegene Wohnung in Hamborg-Altona oder so hebbt, sünd in Mors kneepen. Un ’n Parkplatz för ehr E-Auto wo de Stripp to’n loden övern Börgerstieg hangt, hebbt de je ook ni. Ünnern Streek kriegt also blots ’n poor vun de wat af, de dat nu al good geiht. Dat sünd veellicht 20 Perzent vun de Lüüd in uns Land. Dormit ward Klimaschutz noch mehr to’n Status-Sümbol – dat mutt man sick leisten köön‘. Wo lang hebbt se över de Idee nodacht? Fief Minuten? Tscha, veellicht schulln wi all uns in Dinosauriers trüch entwickeln, denn de hebbt al vör 120 Millioon Johr good mit de Hitten ümgohn kunnt... In düssen Sinn