Wie gaan vir Putin vervolg?

Die kans is skraal dat pres. Wladimir Poetin of enige Rus aangekla sal word van oorlogsmisdade in Oekraïne, sê kenners. Die wêreld is die laaste paar dae geskok deur afgryslike tonele van honderde vermoorde burgerlikes in die strate van Boetsja aan die noordelike buitewyke van die hoofstad, Kiëf. Soldate is ook met massagrafte begroet toe hulle toegang tot die gebied gekry het nadat Russiese soldate hulle aan Boetsja onttrek het. Die mense wat doodgeskiet is, is burgerlikes wat vermoedelik uit die gebied wou vlug. Dit lyk asof van hulle tereggestel is. Sowat 4 miljoen Oekraïners het sedert Rusland se inval uit hul vaderland gevlug. Ek het met Jaco Kleynhans, Solidariteit se hoof internasionale skakeling hieroor gepraat.